عاشق حسین پی ڈی پی سے مستعفی

انہوں نے کہا کہ 'اگر میں پیپلز ڈیموکریٹک پارٹی کے ساتھ زیادہ دیر تک وابستہ رہوں گا تو لوگ مجھے غداروں کی فہرست میں ڈالیں گے'۔

پیپلز ڈیموکریٹک پارٹی (پی ڈی پی) کے سینئر رہنما اور بانی رکن عاشق حسین خان نے پارٹی کی بنیادی رکنیت سے استعفیٰ دے دیا ہے۔ انہوں نے کہا کہ اگر میں اس جماعت کے ساتھ زیادہ دیر تک وابستہ رہوں گا تو لوگ مجھے غداروں کی فہرست میں ڈالیں گے۔

خان نے بدھ کے روز بتایا: 'میں پی ڈی پی کا بانی رکن رہا ہوں۔ میں نے پارٹی میں پانچ برس تک بحیثیت سٹیٹ سکریٹری اپنی خدمات انجام دی ہیں۔ اس پارٹی کے ساتھ زیادہ دیر تک وابستہ رہوں گا تو کل مجھے بھی لوگ غداروں کی فہرست میں ڈالیں گے'۔

ان کا مزید کہنا تھا: 'محبوبہ مفتی نے اقتدار میں رہتے ہوئے دفعہ 370 اور دفعہ 35 اے کی بہت وکالت کی۔ لیکن پانچ اگست 2019 کے بعد پارٹی کی طرف سے بیانات آنا بند ہوگئے۔ جب مجھے لگا کہ پارٹی بالکل خاموش بیٹھ گئی ہے تو میں نے آج اپنے تمام ساتھیوں سمیت پی ڈی پی کی بنیادی رکنیت سے استعفیٰ دے دیا ہے'۔