سرینگر ڈی ڈی سی چیئرپرسن 'اپنی پارٹی' سے

ہفتے کے روز ڈسٹرکٹ ڈیولپمنٹ کونسل (ڈی ڈی سی) کے لئے چیئرپرسن اور وائس چیئرپرسن کا انتخاب عمل میں لایا گیا۔ سرینگر میں 'جموں و کشمیر اپنی پارٹی' نے بھارتیہ جنتا پارٹی کے تعاون سے چیئرپرسن اور وائس چیئرپرسن کی کرسی حاصل کی۔

سرینگر کے ضلع ترقیاتی کمشنر ڈاکٹر شاہد اقبال چودھری نے ڈی ڈی سی چیئرپرسن اور وائس چیئرپرسن کے نام کا اعلان کرتے ہوئے کہا کہ 'کُل چودہ میں سے 13 ڈی ڈی سی ممبران نے اپنے ووٹ کا استعمال کرتے ہوئے ملک آفتاب کو چیئرپرسن بنایا جبکہ بلال بٹ کو نائب چیئرپرسن مقرر کیا گیا۔ دونوں جموں و کشمیر اپنی پارٹی سے تعلق رکھتے ہیں۔

ان کا مزید کہنا تھا کہ 'آفتاب کو دس ووٹ حاصل ہوئے جبکہ ان کے حریف قیصر گنائی کو صرف تین ووٹ حاصل ہوئے۔ وائس چیئرپرسن بلال بٹ کو کل نو ووٹ حاصل ہوئے جبکہ ان کے حریف منظور بٹ کو چار ووٹ حاصل ہوئے۔ منظور بٹ پی ڈی پی سے تعلق رکھتے ہیں۔'

نتائج سامنے آنے کے بعد سرینگر ڈی ڈی سی کے چیئرپرسن اور وائس چیئرپرسن نے علاقے کی ترقی کے لیے کام کرنے کی یقین دہانی کرائی۔

وہیں بھارتیہ جنتا پارٹی سے تعلق رکھنے والے ڈی ڈی سی رکن اعجاز حسین کا کہنا تھا کہ ’’ہماری پارٹی نے ’اپنی پارٹی‘ کو تعاون دیا، شرط یہ ہے کہ وہ دفعہ 370 کی بحالی کے حوالے سے کوئی بات نہیں کریں گے اور اگر ایسا مستقبل میں ہوتا ہے تو ہم اپنا اعتماد واپس لینے سے نہیں کترائیں گے۔‘‘