پی ڈی پی رہنما سرتاج مدنی کی رہائی

رواں ماہ کی 24 تاریخ کو دہلی میں وزیراعظم نریندر مودی کی صدارت میں ممکنہ کل جماعتی میٹنگ کے انعقاد کی پیش رفت بعد جہاں جموں و کشمیر میں سیاسی سرگرمیاں تیز ہوگئی ہیں تو وہیں پی ڈی پی کے سینیئر رہنما اور محبوبہ مفتی کے ماموں سرتاج مدنی کو کئی مہینوں کی قید کے بعد رہا کر دیا گیا ہے۔

پیپلز ڈیموکریٹک پارٹی (پی ڈی پی) کے سینیئر رہنما اور سابق وزیراعلیٰ محبوبہ مفتی کے ماموں سرتاج مدنی کو 6 ماہ کے تک ایم ایل اے ہاسٹل میں قید کیے جانے کے بعد آج رہا کر دیا گیا۔

سرتاج مدنی کی رہائی ایسے وقت میں ہوئی جب جموں و کشمیر کے مین اسٹریم سیاستدانوں اور مرکزی حکومت کے درمیان مذاکرات کے حوالے سے سرگرمیاں شروع ہو رہی ہیں۔

پی ڈی پی ترجمان نے سرتاج مدنی کی رہائی کی تصدیق کی ہے۔

واضح رہے کہ سرتاج مدنی کو گزشتہ برس 20 دسمبر کو حراست میں لیا گیا تھا اور 4 دن بعد 24 دسمبر 2020 کو انہیں ایم ایل اے ہاسٹل منتقل کیا گیا تھا۔