سرینگر:جموں کشمیر میں پنچایتی انتخابات کا بگل بجتے ہی پنچایتی ممبران سرگرم ہو گئے ہیں اور پنچایتی ممبران کے ایک گروپ نے اسٹیٹ الیکشن کمیشنر سے مطالبہ کیا ہے کہ انکے انتخابات ڈی ڈی سی انتخابات کے ساتھ منعقد کیے جائیں اور پنچایتی حلقوں کی حد بندی بھی عمل میں لائی جائے۔ آل جموں کشمیر پنچایت کانفرنس کے صدر انیل شرما نے بدھ کو سرینگر میں منعقدہ ایک پریس کانفرنس کے دوران کہا کہ ’’سٹیٹ الیکشن کمشنر پنچایتی حلقوں کی حدبندی کرے تاکہ ہر پنچایتی حلقہ میں لوگوں کی تعداد یکساں رہے۔‘‘
انیل شرما نے کہا کہ پنچایت کانفرنس پنچایتی انتخابات میں حصہ لینے کے لئے ہمیشہ اور ہر وقت تیار ہے اور انتخابات کے انعقاد کا خیر مقدم کر رہی ہے لیکن انکے مطالبات پر بھی غور کیا جائے۔ انہوں نے مزید کہا کہ پنچایتی نظام کی پانچ سالہ مدت جنوری 2024 میں اختتام ہو رہی ہے جبکہ ڈی ڈی سی کونسل نظام کی مدت جنوری 2025 میں ختم ہو رہی ہے۔ شرما کا کہنا ہے کہ ’’پنچایتی راج ایکٹ کے مطابق پنچایتی و ڈی ڈی سی انتخابات ایک ہی وقت پر منعقد ہونے چاہئے تاکہ انتخابات اور پنچایتی نظام میں یکسانیت رہے لیکن جموں کشمیر میں ایکٹ کی خلاف ورزی ہو رہی ہے اور پنچایت انتخابات امسال اور ڈی ڈی سی انتخابات سنہ 2025 میں منعقد ہو رہے ہین۔‘‘
انہوں نے مزید کہا کہ ’’پنچایتی انتخابات اس نظام کی مدت کے اختتام سے 45 دن قبل منعقد کئے جانے چاہئے لیکن جب اسٹیٹ الیکشن کمشنر نے اکتوبر نومبر میں انتخابات منعقد کرنے کا اعلان کیا ہے تو پھر ایکٹ کی پاسداری کیسے ہو رہی ہے؟‘‘ یاد رہے کہ اسٹیٹ الیکشن کمیشنر برج راج شرما نے گزشتہ روز ای ٹی وی بھارت کے ساتھ بات کرتے ہوئے کہا تھا کہ جموں کشمیر میں پنچایتی انتخابات قانون کے مطابق شیڈول پر منعقد ہوں گے۔