India Pak Match جموں و کشمیر اسٹوڈنٹس ایسوسی ایشن نے ایڈوائزری جاری کی

دنیا بھر کے کرکٹ شائقین آئی سی سی ورلڈ کپ میں پاک بھارت کے درمیان 14 اکتوبر بروز ہفتہ کو ہونے والے میچ کا بے صبری سے انتظار کر رہے ہیں۔ اس شاندار میچ کے لیے احمد آباد میں سکیورٹی کے سخت انتظامات کیے گئے ہیں۔

سرینگر : آئی سی سی کرکٹ ورلڈ کپ 2023 میں 14 اکتوبر یعنی ہفتے کے روز ہونے والے بھارت اور پاکستان کے درمیان ہونے والے میچ سے قبل، جموں و کشمیر اسٹوڈینٹس ایسوسی ایشن (جے کے ایس اے) نے ملک بھر کی مختلف یونیورسٹیوں میں زیر تعلیم جموں و کشمیر سے تعلق رکھنے والے طلبہ سے اپیل کی ہے کہ وہ سماجی رابطہ ویب سائٹ پر ایسی پوسٹس سے پرہیز کریں جو انہیں پریشانی میں ڈال سکتے ہیں۔

ایسوسی ایشن کے قومی کنوینر ناصر کھوہامی کا کہنا تھا کہ "ہم نے ملک بھر کی مختلف یونیورسٹیوں میں زیر تعلیم کشمیری طلبہ کو تاکید کی کہ وہ اپنی تعلیم اور کیریئر کے لیے اپنی ترجیحات کا تعین کریں، جس کے لیے وہ اپنی آبائی ریاست جموں و کشمیر سے ملک کے مختلف حصوں میں قیام کر رہے ہیں۔"

اُن کا مزید کہنا تھا کہ"طلبہ اس میچ (بھارت پاک میچ)کو ایک کھیل کے طور پر لے اور میچ کے دوران اور بعد میں سوشل میڈیا پوسٹس پر اُن پوسٹس سے پرہیز کریں، جس سے ملک بھر میں کسی بھی ادارے میں کسی بھی قسم کی بے ضابطگی پیدا ہو سکتی ہے یا وہ مشکل میں پڑ سکتے ہیں۔

انہوں نے کہا کہ کوئی غیر ضروری بحثوں، مباحثوں یا سوشل میڈیا چیٹ میں نہیں پڑے جو ان کے لیے بعد میں پریشانی کا باعث بن سکتی ہے اور طلبہ کو چاہئے کہ وہ حقیقی اسپورٹس مین جذبے کے ساتھ اس میچ سے لطف اندوز ہو جائے۔