سری نگر: 'ایوان صحافت' میں کورونا کی جانچ ملتوی

سری نگر کے ایوان صحافت میں کورونا وائرس جانچ کے نمونے آج لیے جانے تھے لیکن موسم خراب ہونے کے سبب اگلی تاریخ تک کے لیے یہ کیمپ ملتوی کر دیا گیا ہے، تاریخ کا اعلان جلد ہی کیا جائے گا۔

وادی کشمیر کی گرمائی دارالحکومت سرینگر میں واقع 'ایوان صحافت' میں صحافیوں کی کورونا وائرس کی جانچ کے لیے نمونے لے جانے تھے۔ تاہم خراب موسم کی وجہ سے یہ ممکن نہیں ہو سکا۔

ایوان صحافت نے اپنے بیان میں کہا کہ 'محکمہ صحت نے خراب موسم کی وجہ سے صحافیوں کے نمونے کے لیے جو کیمپ آج لگا ئے جانے تھے۔ اسے ملتوی کیا گیا ہے اگلی تاریخ کے بارے میں جلد ہی مطلع کیا جا ئے گا'۔

ایک سینئر صحافی نے ای ٹی وی بھارت کو بتایا کہ'صحافیوں کو کیوں ترجیح دی جا رہی ہے؟ جو کوئی بھی مثبت ملے اس کے تمام رابطوں کا پتا لگا کر کورونا وائرس کی جانچ کی جانی چاہیے۔

انتظامیہ کو چاہئے کہ وہ پہلے مسافروں پھر طبی اور حفاظتی عملے کی جانچ کرائے'۔ ان کا مزید کہنا تھا کہ' مجھے کرونا وائرس جانچ کرنے سے کوئی اعتراض نہیں لیکن میں سمجھتا ہوں کہ اس وقت یہ غیر ضروری ہے'۔ ایسے میں صرف عوامی خدشات مرتب ہو سکتے ہیں۔

انہوں نے کہا کہ' جسے بھی جانچ کرانی ہے یا جانچ کا ارداہ رکھتا ہو وہ ذاتی طور جاکر جانچ کروا سکتا ہے۔ اس میں کشمیر کے ایوان صحافت، اور انتظامیہ کو کیوں شامل کرنے کی ضرورت ہے۔

اس تعلق سے ایوان صحافت کے صدر شجاع الحق کا کہنا تھا کہ' کئی صحافی اور فوٹو جرنلسٹ جو کورونا وائرس کے بیچ قرنطینہ، ہسپتال اور دیگر جگہوں پر اپنی خدمات انجام دینے جاتے ہیں ان کی کورونا وائرس جانچ کشمیر پریس کلب میں کروائی جائے۔'

ان کا کہنا تھا کہ' کئی ماہ سے اس معاملے میں کاروائی جاری تھی آج صحافیوں کے نمونے لینے تھے تاہم خراب موسم کی وجہ سے یہ ممکن نہیں ہو پایا۔ امید ہے کی اگلی تاریخ کا اعلان جلد ہی کیا جائے گا۔'

سری نگر شہر میں گزشتہ 24گھنٹوں میں دو ایس ایس جی اہلکار اور ایک آئی اے ایس افسر کی رپورٹ مثبت پائی گئی۔ جس کے بعد عوام میں مزید خدشات بڑھ گئے ہیں۔

واضح رہے گزشتہ روز وادی میں کرونا وائرس کے 1 ہزار 853 مثبت معاملے سامنے آئے ہیں جن میں سے 791 افراد صحت یاب ہوئے ہیں، جبکہ 25 لوگوں کی موت بھی ہو چکی ہے۔

مرکز کے زیر انتظام جموں و کشمیر کی بات کریں تو یہاں کل 2ہزار 341 معاملے سامنے آئے ہیں جب کی 908 افراد صحت یاب ہوئے ہیں اور 28 لوگوں کی موت ہوئی ہیں۔