'جموں و کشمیر میں کافی مقدار میں آکسیجن دستیاب'

کورونا وائرس کی دوسری لہر کی وجہ سے پیدا ہونے والے سنگین چیلنج سے نمٹنے کے لیے پوری سرکاری مشینری تیار ہے۔

اس کے علاوہ کووڈ 19 کی روک تھام کے لئے تمام اقدامات بھی موجود ہیں۔ نیز آکسیجن سلنڈروں کا مناسب بفر سٹاک دستیاب ہے اور لوگوں کو گھبرانے کی ضرورت نہیں ہے۔ جموں و کشمیر میں آکسیجن کی کمی کے سبب ایک بھی مریض کی موت نہیں ہوگی۔

ان باتوں کا اظہار پرنسپل سیکرٹری صنعت و حرفت راجن پرکاش ٹھاکر نے منگل کو شیر کشمیر انسٹی چیوٹ آف میڈیکل سائنسز (ایس کے آئی ایم ایس) صورہ سرینگر میں آکسیجن کنسنٹریشن سینٹر، آکسیجن سلنڈروں کا بفر سٹاک اور کووڈ مریضوں کے لئے بستروں کی فراہمی کا جائز ہ لینے کے دوران کیا ہے۔

پرنسپل سیکرٹری نے کہا کہ اس مقام پر آکسیجن کی کمی نہیں ہے۔ انہوں نے بتایا کہ کووڈ 19 مریض کے ہر شخص کے لئے بیڈ دستیاب ہیں۔ ہم مستقبل میں طلب اور ہنگامی صورتحال کی حالت میں اس میں اضافہ کریں گے۔

انہوں نے کہا کہ اِنتظامیہ نے تمام ہسپتالوں میں آکسیجن کی وافر فراہمی کو یقینی بنانے کے لئے موجودہ صورتحال کے پیش نظر تمام غیر طبی استعمالات سے آکسیجن کو طبی استعمال میں تبدیل کرنے کا فیصلہ کیا ہے۔

پرنسپل سیکرٹری نے لوگوں سے اپیل کی ہے کہ وہ کووڈ رہنما اصولوں اور ایس او پیز پر من و عن عمل کریں۔ سماجی دوری برقرار رکھیں، ماسک پہنیں اور بغیر کسی ضروری کام کے باہر نہ جائیں۔

دریں اثنا انہوں نے سکمز انتظامیہ کو ہنگامی بنیادوں پر پوری مشینری کو تیار رکھنے پر زور دیا۔

اس موقعہ پر ڈائریکٹرسکمز اے جی آہنگر نے کہا کہ اس ادارے نے کووڈ مریضوں کے لئے 260 بستر محفوظ رکھے ہیں اور اس وقت ہسپتال میں 156 کووڈ مریض داخل ہیں۔

انہوں نے کہا کہ انسٹی چیوٹ میں آکسیجن کی موجودہ کھپت کی شرح 3.93 لاکھ لیٹر فی گھنٹہ ہے اور آکسیجن کی اضافی مطلوبہ مقدار 1.5 لاکھ فی گھنٹہ ہے۔