High BP in JK: جموں وکشمیر کی 20 فیصد سے زائد آبادی ہائی بلڈ پریشر کی شکار، سروے

آیوشمان بھارت کی اسکرینگ مہم کے دوران اس بات کا انکشاف ہوا ہے کہ وادی کشمیر میں سَوا پانچ لاکھ سے زائد جبکہ صوبہ جموں میں پونے چار لاکھ کے قریب افراد ہائی بلڈ پریشر کے شکار ہیں۔

سرینگر:جموں وکشمیر میں غیر متعدی امراض کی صحیح تعداد کا پتہ لگانے کے لیے ’’آیوشمان بھارت‘‘ کی جانب سے شروع کی گئی اسکریننگ مہم کے دوران یہ بات سامنے آئی ہے کہ یونین ٹیریٹری جموں وکشمیر میں 20 فیصد آبادی ہائی بلڈ پریشر کے عارضہ میں مبتلا ہے۔ ایسے میں مجموعی طور پر صوبہ جموں سمیت وادی کشمیر میں 9 لاکھ افراد ہائی بلڈ پریشر سے متاثر پائے گئے ہیں۔

تازہ سروے میں اس بات کا انکشاف کیا گیا ہے کہ کشمیر صوبے کے 10 اضلاع میں بلڈ پریشر کی تشخیص کے لیے 22 لاکھ 5 ہزار 980 افراد کی اسکریننگ کی گئی ہے۔ جن میں 24 فیصد یعنی 5 لاکھ 27 ہزار 965 افراد میں ہائی بلڈ پریشر کی تصدیق ہوئی ہے۔ وہیں جموں صوبے کے 23 لاکھ 3 ہزار 758 کی آبادی میں سے 3 لاکھ 73 ہزار 983 افراد میں بلڈ پریشر کی تصدیق ہوئی ہے۔

ادھر، وادی کشمیر میں ضلع سطح پر ظاہر کئے گئے اعداد و شمار کے مطابق جنوبی کشمیر کے ضلع اننت ناگ میں 3 لاکھ 7 ہزار سے زائد افراد میں سے74 ہزار سے زیادہ افراد ہائی بلڈ پریشر سے متاثر پائے گئے۔ ضلع کولگام کی ایک لاکھ 56 ہزار سے زیادہ افراد میں ہائی بلڈ پریشر کا تشخیص کیا گیا جن میں سے31 ہزار سے بھی زیادہ افراد اس بیماری میں مبتلا تھے۔ اسی طرح پہاڑی ضلع شوپیاں کی 98 ہزار 405 افراد میں سے تقریباً 20 ہزار افراد ہائی بی پی کی بیماری کے شکار پائے گئے۔ جبکہ پلوامہ میں 2 لاکھ 10 ہزار سے زائد افراد میں یہ تشخیص کی گئی جن میں سے 42 ہزار 184 میں اس بیماری کی تصدیق ہوئی ہے۔

اسی طرح وسطی کشمیر کے ضلع سرینگر میں 4 لاکھ 69 ہزار سے زیادہ افراد کی اسکریننگ کی گئی جن میں سے لگ بھگ 94 ہزار افراد میں ہائی بلڈ پریشر پایا گیا۔ گاندربل ضلع میں ایک لاکھ 9 ہزار سے زائد افراد کے نمونے حاصل کئے گئے جن میں سے تقریبا 22 لاکھ افراد ہائی بلڈ پریشر میں مبتلا پائے گئے۔ جبکہ بڈگام کے 2 لاکھ 72 ہزار سے زیادہ افراد کی سکریننگ عمل میں لائی گئی جن میں 54 ہزار سے زائد افراد اس بیماری کے شکار پائے گئے۔

ادھر، شمالی کشمیر کے بارہمولہ ضلع میں ہائی بی پی بیماری کا پتہ لگانے کے لیے 3 لاکھ 75 ہزار 736 افراد کی تشخیص کی گئی جن میں سے 75 ہزار 147 افراد اس بیماری میں مبتلا پائے گئے۔ بانڈی میں اسکریننگ کے دوران ایک لاکھ 42 ہزار 487 افراد میں سے 28 ہزار497 ہائی بلڈ پریشر بیماری کے شکار پائے گئے۔ وہیں ضلع کپوارہ میں 3 لاکھ 23 ہزار سے زائد افراد کا تشخیص عمل میں لایا گیا جن میں 64 ہزار 792 افراد ہائی بلڈ پریشر سےمتاثر تھے۔