اسکول چلے ہم ----

وادی کشمیر میں ہائی تا ہائر سیکنڈری سطح کے اسکولوں میں تعلیمی سرگرمیاں شروع ہونے کے بعد اب رواں ماہ کی 8 تاریخ سے پرائمری تا مڈل سطح کے اسکول بھی درس و تدریس کے لئے کھل رہے ہیں۔

وادی کشمیر میں پیر کے روز نویں سے بارہویں جماعت کے طلبہ و طالبات کے لئے اسکول دوبارہ کھل گئے ہیں۔

تقریبا دو برس کے طویل عرصے کے بعد ہائی سے ہائر سیکنڈری سطح تک کے اسکولوں میں تدریسی سرگرمیاں بحال ہو گئیں۔ پیر کی صبح شہر و دیہات میں رنگ برنگی اسکولی وردیوں میں ملبوس بچے اپنے اسکولوں کی جانب پیش قدمی کرتے ہوئے دیکھے گئے۔ وہیں طلبہ و طالبات کی ایک بڑی تعداد کو اسکول بسوں کا انتظار کرتے ہوئے بھی دیکھا گیا۔

کافی عرصہ بعد طالبہ کا اسکولوں کا رخ کرنے سے ایک الگ اور خوشگوار ماحول دیکھنے کو ملا۔ جہاں اساتذہ کا طلبہ کو گرمجوشی سے استقبال کرتے ہوئے دیکھا گیا۔ وہیں طلبہ اپنے ہم جماعتیوں اور دیگر دوستوں کے ساتھ بغل گیر ہوتے ہوئے بھی دیکھے گئے۔

اس موقع پر طلبہ و طالبات نے اپنی خوشی کا اظہار کرتے ہوئے کہا کہ مدتوں بعد اپنے دوستوں اور اساتذہ کو دوبارہ اسکولوں میں دیکھتے ہوئے کافی خوشی محسوس ہورہی ہے۔

اسکولوں میں درس و تدریس کی سرگرمیاں شروع کرنے سے قبل وضح کئے گئے کووڈ-19 کے تمام رہنما خطوط عملائے جا رہے ہیں۔ جہاں طلب علموں کا اسکولوں کے اندر داخل ہونے کے ساتھ ہی تھرمل سکریننگ عمل میں لائی جارہی ہے۔ وہیں سنیٹائزر کی دستیابی اور ماسک لگانے پر خاص دھیان رکھا جارہا ہے۔ کسی بھی طالب علم کو بنا ماسک کے اسکول کے اندر داخل ہونے کی اجازت نہیں دی جارہی ہے۔

طلبہ کی آواجاہی سے بازاروں کی رونقیں بھی جیسے لوٹ آئی ہیں۔

ادھر طلبہ کے ساتھ ساتھ اسکول اساتذہ بھی کافی خوش نظر آرہے تھے۔ اساتذہ کا کہنا ہے کہ بچوں کو کلاسز میں رو برو اور پڑھائی کرتے ہوئے دیکھ کر بہت اچھا لگ رہا ہے۔

بسکو اسکول کے پرنسپل السٹرا فریز کہتے ہے کہ اسکول میں درس و تدریس کی سرگرمیاں شروع کرنے سے قبل ہی تمام تیاریوں کو حتمی شکل دی گئی ہے تاکہ طلبہ و طالبات بنا کسی خلل یا پریشانی کے اپنے اپنے کلاسز میں دوبارہ پڑھائی شروع کر سکیں۔

واضح رہے کشمیر وادی میں ہائی تا ہائر سیکنڈری سطح کے اسکولوں میں تعلیمی سرگرمیاں شروع ہونے کے بعد اب رواں ماہ کی 8 تاریخ سے پرائمری تا مڈل سطح کے اسکول بھی درس و تدریس کے لئے کھل رہے ہیں۔