Stabbing Case In Srinagar ڈلگیٹ سرینگر میں آپسی جھگڑے میں 15 سالہ لڑکے کا قتل، ملزم گرفتار

سرینگر کے ڈلگیٹ علاقے میں ہفتے کی دوپہر ایک کمسن لڑکے کی چھاتی میں چھرا گھونپ کر اس کا قتل کیا گیا۔ پولیس نے ملزم کمسن کو گرفتار کیا۔

سرینگر: جموں وکشمیر کی گرمائی دارالحکومت سرینگر کے چنار باغ علاقے میں کمسن لڑکے کی چھاتی میں چھرا گھونپ کر اس کا قتل کیا گیا۔پولیس نے فوری کارروائی عمل میں لا کر ملزم (کمسن) کو دھر دبوچ کر سلاخوں کے پیچھے دھکیل دیا۔

اطلاعات کے مطابق سرینگر کے چنار باغ علاقے میں اس وقت سنسنی کا ماحول پھیل گیا جب ایک کمسن کی چھاتی میں چھرا گھونپ کر اس کا سنسنی خیز طریقے سے قتل کیا گیا۔مقامی ذرائع نے بتایا کہ دو کمسن لڑکوں کے درمیان چنار باغ پارک میں کسی بات پر تو تو میں میں شروع ہوئی، جس نے جھگڑے کا رخ اختیار کیا اسی اثنا میں 15سالہ لڑکے کی چھاتی میں چھرا گھونپا گیا جس وجہ سے وہ شدید طورپر زخمی ہوا۔

معلوم ہوا ہے کہ آس پاس موجود لوگوں نے زخمی لڑکے کو علاج ومعالجہ کی خاطر نزدیکی ہسپتال منتقل کیا تاہم وہاں پر تعینات ڈاکٹروں نے اسے مردہ قرار دیا۔مقامی ذرائع کا کہنا ہے کہ کمسن لڑکے پر وار کرنے کے بعد ملزم وہاں سے بھاگ گیا۔جوں ہی کھنہ کھن ڈلگیٹ میں دسویں جماعت میں زیر تعلیم طالب علم کو قتل کرنے کی خبر پھیل گئی تو وہاں کہرام مچ گیا، خواتین سینہ کوبی کرنے لگیں۔مقامی لوگوں نے بتایا کہ چنار پارک غیر قانونی سرگرمیوں کے لئے استعمال ہو رہی ہیں۔

انہوں نے بتایا کہ کئی بار ضلعی انتظامیہ کو اس بارے میں آگاہی فراہم کی کہ چنار باغ میں قمار بازی، شراب نوشی اور دوسرے غیر قانونی کام ہو رہے ہیں لیکن اس کی اور کوئی توجہ نہیں دی گئی۔

ان کا کہنا تھا کہ اس پارک میں ہر روز لڑائی جھگڑے ہوتے رہتے ہیں لہذا اس کی اور انتظامیہ کو توجہ مبذول کرنی چاہئے۔

دریں اثنا پولیس نے ٹویٹ کے ذریعے جانکاری دیتے ہوئے بتایا کہ چنار باغ میں ایک پندرہ سالہ لڑکے پر چاقو سے حملہ کرکے اس کو قتل کرنے کے الزام میں ایک کمسن کو پکڑا گیا۔انہوں نے کہاکہ ملزم کے انکشاف پر جرم انجام دینے کے لئے استعمال کیا جانے والا ہتھیار بھی برآمد کیا گیا جس کو ملزم نے دلدل علاقے میں پھینکا تھا۔اس سلسلے میں پولیس اسٹیشن کوٹھی باغ میں کیس درج کیا گیا۔