سرینگر ائیر پورٹ پر 10 نئے ایکسرے چیکنگ کاؤنٹرس نصب کیے جا رہے ہیں

دارالحکومت سرینگر کے ہوائی اڈے کے توسیعی منصوبے کے تحت آئندہ برس 10نئے ایکسرے چیکنگ کاؤنٹرس نصب کیے جا رہے ہیں۔

توسیعی منصوبے کے تحت آئندہ برس سے سرینگر ائیر پورٹ کے داخلی دروازوں پر نئے 10ایکسرے چیکنگ کونٹرس قائم کیے جا رہے ہیں، جس سے سرینگر ائیر پورٹ کے دروازوں پر ایکسرے کائونٹروں کی تعداد 16 ہو جائے گی۔

ڈائریکٹر ائیرپورٹ سنتوش ڈھوکے نے کہا ہے کہ اس وقت داخلی دروازوں میں ایکسرے چیکنگ مشینیں نصب ہیں جبکہ آئندہ وقت میں مزید مشینوں کو نصب کیا جا رہا ہے جس سے سفر کرنے والوں کا وقت بچنے کے ساتھ ساتھ کافی حد تک آسانی بھی ہوگی۔

انہوں نے کہا کہ ’’1100کروڑ روپے کے منصوبے کے لیے کنسلٹنٹ تعینات کیا گیا ہے اور اس کا نقشہ بھی تیار کیا گیا ہے۔ امید ہے کہ رواں برس کے آخر تک ٹینڈرنگ کا عمل بھی مکمل کیا جائے گا۔‘‘

سنتوش ڈھوکے نے مزید کہا کہ ائیر پورٹ میں منتقل ہونے والی ٹنل بھی تعمیر کی جائے گی۔ اس وقت 4 ٹنلیں کام کر رہی ہیں جبکہ 5ویں ٹنل نئے توسیع منصوبہ کے تحت بنائی جائے گی کیونکہ ہوائی جہازوں اور مسافرین کی تعداد میں اضافہ ہو رہا ہے۔

واضح رہے کہ سرینگر کا بین الاقوامی ہوائی اڈا براہ راست انڈین ائیر فورس کے زیر کنڑول میں ہے۔