شوپیان میں تصادم، پانچ عسکریت پسند ہلاک

ہلاک شدہ عسکریت پسندوں کی شناخت نہیں ہوسکی ہے،معاملے کی حساسیت کو دیکھتے ہوئے ضلع میں موبائل انٹرنیٹ سروس بند کر دی گئی ہے۔

جنوبی کشمیر کے شوپیاں ضلع میں آج علی الصباح سکیورٹی فورسز اور عسکریت پسندوں کے مابین مسلح تصادم میں پانچ عسکریت پسند ہلاک ہوگئے ۔ تادم تحریر علاقہ میں سرچ آپریشن جاری ہے۔

اطلاع کے مطابق سکیورٹی فورسز کو شوپیاں ضلع کے سگو ہندہامہ علاقے میں عسکریت پسندوں کی موجودگی کی خفیہ اطلاع ملی تھی جس کے بعد آرمی کی 44 راشٹریہ رائفلز، سی آر پی ایف اور پولیس نے علاقہ کو اپنے محاصرے میں لے کر تلاشی مہم شروع کردی۔

سکیورٹی اہلکاروں کی مشترکہ ٹیم جب ایک مخصوص مقام کے قریب پہنچی تو وہاں چھپے عسکریت پسندوں نے سکیورٹی فورسز پر فائرنگ کی۔ جوابی کاروائی میں پانچ عسکریت پسند ہلاک ہو گیے ہیں۔ ہلاک شدہ عسکریت پسندوں کی شناخت ابھی تک نہیں ہو پائی ہے۔

قابل ذکر ہے کہ گزشتہ دنوں ہلاک ہونے والے عسکریت پسندوں کی شناخت پولیس نے ظاہر نہیں کی تھی۔
ذرائع کے مطابق ضلع میں موبائل انٹرنیٹ سروس بند کر دی گئی ہے۔

اس سلسلے میں آرمی نے ایک بیان جاری کیا تھا جس میں انہوں نے بتایا کہ آج صبح 5:30 بجے عسکریت پسندوں اور سکیورٹی فورسز کے درمیان گولیوں کا تبادلہ ہوا، سکیورٹی فورسز نے جوابی کارروائی کرتے ہوئے تین عسکریت پسندوں کو ہلاک کردیا۔ انہوں نے کہا آپریشن ابھی جاری ہے۔ تاہم ابھی پانچ عسکریت پسندوں کی ہلاکت کی تصدیق ہو گئی ہے۔

واضح رہے شوپیان میں یہ اس ہفتے ہونے والا تیسرا تصادم ہے۔ گزشتہ دو تصادم ارائیوں میں نو عسکریت پسندوں کو ہلاک کیا گیا ہیں۔