شوپیان: غریب کنبے سے آن لائن 80 ہزار روپئے کی لوٹ

جعلسازوں نے بینک کے نام پر فون کر او ٹی پی مانگا اور اکاؤنٹ سے روپئے نکال لئے۔

جموں کشمیر میں آن لائن جعلسازی کے بڑھتے رجحان کے درمیان جنوبی کشمیر کے ضلع شوپیان کے ایک غریب کنبہ 80 ہزار روپے لوٹ کا شکار ہوگیا ہے۔ شوپیان کے پہنو نامی گاؤں سے تعلق رکھنے والے غلام محمد ڈار نے بتایا کہ انہیں 10 اگست کو ایک فون کال موصول ہوا۔ اس دوران فون کرنے والے شخص نے خود کو بینک ملازم بتا کر او ٹی پی مانگ لیا اور مذکورہ فون کالر کو او ٹی پی دینے پر انہوں نے بینک سے 80 ہزار روپے کھو دئے۔

پانچ بیٹیوں کے باپ ڈار نے کہا کہ انہوں نے مویشی فروخت کر کے بیٹی کی شادی کیلئے یہ پیسے جمع کر رکھے تھے تاہم انہیں آن لائن جعلسازوں نے لوٹ لیا۔غریب کنبے نے انتظامیہ سے مدد کی اپیل کی ہے۔

انہوں نے کہا کہ اب ان کے پاس کوئی پیسہ نہیں ہے اور ان کی بیٹی کی شادی کے لیے انہوں نے یہ 80 ہزار روپیہ مویشی فروخت کر کے جمع کیا تھا، جنہیں جعلسازوں نے آن لائن لوٹ لیا۔

خیال رہے کہ یہ غلام محمد ڈار کا پہلا واقعہ نہیں ہے بلکہ اس سے قبل بھی کئی مرتبہ لوگوں سے آن لائن فون کالز کے ذریعے پیسے لوٹ لئے گئے ہیں۔ جس کے بعد سائبر پولیس نے متحرک ہوکر ان جعلسازوں کے خلاف کارورائی شروع کر دی ہے اور کئی مرتبہ پیسے بھی واپس وصول کر دئے گئے ہیں۔