Shopian Attack شوپیاں حملہ: مفرور عسکریت پسندوں کی تلاش جاری، کئی افراد سے پوچھ گچھ

جنوبی کشمیر کے ضلع شوپیاں کے گاگرن گاوں میں جمعے کی شام کو مشتبہ عسکریت پسندوں نے بہار سے تعلق رکھنے والے مزدوروں پر اندھا دھند فائرنگ کی جس کے نتیجے میں تین مزدور شدید طورپر زخمی ہوئے ہیں۔

سری نگر: جنوبی ضلع شوپیاں کے گاگرن گاوں میں جمعے کی شام کو تین غیر مقامی مزدوروں پر فائرنگ میں ملوث عسکریت پسندوں کی بڑے پیمانے پر تلاش شروع کی گئی ہے۔ ایڈیشنل ڈائریکٹر جنرل آف پولیس کشمیر رینج وجے کمار نے شوپیاں کی سیکورٹی صورتحال کا جائزہ لینے کے دوران مفرور عسکریت پسندوں کو جلد از جلد کیفر کردار تک پہنچانے کے احکامات جاری کئے۔ ذرائع نے بتایا کہ گاگرن شوپیاں میں تین غیر مقامی مزدوروں پر حملے میں ملوث عسکریت پسندوں کی تلاش دوسرے روز بھی جاری رہی۔

ذرائع نے بتایا کہ شوپیاں کے گاگرن گاوں کے ساتھ ساتھ آس پاس علاقوں میں چھاپہ ماری کے دوران کئی افراد کو پوچھ تاچھ کی خاطر پولیس اسٹیشن منتقل کیا گیا۔ ذرائع نے مزید کہاکہ حملے میں ملوث عسکریت پسندوں کی شناخت کی خاطر ہیومن اور ٹیکنیکی صلاحیتوں کو بروئے کار لایا جارہا ہے۔ ایڈیشنل ڈائریکٹر جنرل آف پولیس کشمیر رینج وجے کمار نے ضلع کی سیکورٹی صورتحال کا جائزہ لیا خاص کر ان علاقوں کا جہاں پر غیر مقامی مزدور مقیم ہیں۔

ذرائع کے مطابق ضلع بھر میں سیکورٹی کے غیر معمولی انتظامات کئے گئے ہیں جبکہ عسکریت پسندوں کے سہولت کاروں اور مدد گاروں کی بھی بڑے پیمانے پر تلاش شروع کی گئی۔ ذرائع کا کہنا ہے کہ اے ڈی جی پی وجے کمار نے مفرور عسکریت پسندوں کو جلد از جلد کیفر کردار تک پہنچانے کا حکم دیا ہے۔ بتادیں کہ شوپیاں کے گاگرن گاوں میں جمعے کی شام کو مشتبہ عسکریت پسندوں نے بہار سے تعلق رکھنے والے مزدوروں پر اندھا دھند فائرنگ کی جس کے نتیجے میں تین مزدور شدید طورپر زخمی ہوئے۔ تینوں کو علاج ومعالجہ کی خاطر سری نگر منتقل کیا گیا جہاں پر دو صدر ہسپتال اور ایک کو بون اینڈ جوائنٹ ہسپتال میں بھرتی کیا گیا۔ ذرائع کے مطابق ایک مزدور کی حالت تشویشناک بنی ہوئی ہے۔

یو این آئی