ہلاک شدہ عسکریت پسند کا بھائی گرفتار، شوپیان میں زبردست مظاہرے

شوپیان میں ہلاک شدہ عسکریت پسند کے بھائی کی گرفتاری پر مقامی لوگوں نے زبردست مظارے کیے اور اس کی رہائی کا مطالبہ کیا۔

جنوبی کشمیر کے شوپیان ضلع کے پنجورہ علاقے میں اس وقت لوگ گھروں سے باہر آے اور نعرے بازی کی جب فورسز کے اہلکاروں نے ہلاک شدہ مقامی عسکریت پسند کے بھائی کو اس کی رہائش گاہ سے گرفتار کرلیا۔

تفصیلات کے مطابق، فورسز اہلکاروں نے منگل کی رات پنجورہ شوپیان میں عسکریت پسند عمر دھوبی کے بھائی فیضان دھوبی کواس کی رہائش گاہ سے گرفتار کیا۔ عمر دھوبی رواں برس کی 9 جون کو فورسز اہلکاروں کے ساتھ اپنے تین ساتھیوں سمیت ایک انکاؤنٹر میں ہلاک ہو گیا تھا۔

اس کے فوراَ بعد پنجورہ علاقے کے کچھ نوجوان اپنے گھروں سے باہر آئے اور مساجدوں میں لاؤڈ سپیکروں پر اعلانات کرکے لوگوں سے گھروں سے باہر آنے کے لیے کہا۔

کچھ ہی لمحوں میں لوگ گھروں سے باہر آئے جنہوں نے سڑکوں اور لاؤڈ سپیکروں پر اسلام و آزادی کے حق میں نعرے بازی کی۔ لوگ فیضان دھوبی کی رہائی کا مطالبہ کررہے ہیں۔