Dilapidated Roads In Shopian لون محلہ میں سڑک کی خستہ حالی سے عوام پریشان

ضلع شوپیان کے سیدھو علاقہ کے لون محلہ میں سڑک کی خستہ حالی سے مقامی لوگ کافی پریشان ہیں۔ ان کا کہنا ہے کہ کئی بار بلاک ڈیولپمنٹ آفس کا چکر لگائے اورعلاقے کے متعلقہ ڈی ڈی سی کے پاس درخواست بھی دی، لیکن آج تک اس مسئلہ پر غور نہیں کیا گیا۔ bad condition of street people Suffering

شوپیان: جموں و کشمیر کے ضلع شوپیان کے سیدھو علاقہ کا لون محلہ کئی برسوں سے مقامی آبادی کے لیے باعث عذاب بن گیا ہے کیونکہ محلہ میں پانی کی نکاسی نا ہونے کے سبب بارش کے موسم میں گندہ پانی جمع ہوجاتا ہے جس کے سبب عوام اور اسکولی بچوں کو کافی مشکلات کا سامنا کرنا پڑتا ہے۔ مقامی لوگوں کا کہنا ہے کہ یہ محلہ تقریباً 90 گھروں کے لیے مین سڑک تک پہنچنے کا واحد راستہ ہے۔ لون محلہ میں آج تک رامنگری بلاک ڈیولپمنٹ آفس نے کوئی نالی یا ڈرین کا انتطام نہیں کیا ہے ،جسکے نتیجے میں یہاں گھروں سے نکلنے والا گندہ پانی بھی اسی محلہ میں جمع ہوجاتا ہے۔

لوگوں کا کہنا ہے کہ ہم گزشتہ تین سالوں سے بلاک ڈیولپمنٹ آفس کا چکر کاٹ رہے ہیں اور علاقے کے متعلقہ ڈی ڈی سی کے پاس ایک درخواست بھی پیش کی، لیکن آج تک اس مسئلہ پر غور نہیں کیا گیا۔ انہوں نے کہا کہ ہمیں صبح و شام کے وقت اسکول جانے والے چھوٹے بچوں کو کاندھے پر اُٹھا کر سڑک تک لے جانا پڑتا ہے۔

ایک مقامی شخص غلام محمد نے بتایا کہ میری عمر 70 سال ہے بچپن سے لیکر آج تک میں نے اپنے علاقے کی حالت بد سے بدتر ہوتے دیکھی ہے۔ انہوں نے بتایا کہ ہمارے محلہ کی حالت بہت خراب ہے لیکن اس پر ابھی تک کسی کی توجہ نہیں گئی۔ انہوں نے بتایا کہ ہم نے کئی بار اعلیٰ حکام تک اس مسئلہ کو اٹھایا لیکن اس علاقے کی طرف کسی نے توجہ نہیں دی۔ انہوں نے ضلع انتظامیہ شوپیاں اور گورنر انتظامیہ سے گزارش کی ہے کہ لون محلہ میں سڑکوں کی مرمت کا کام جلد از جلد شروع کیا جائے تاکہ آج کے دور میں عام لوگوں کو مصیبتوں کا سامنا نہ کرنا پڑے۔