محکمہ امور صارفین کے عہدیداروں نے ضلع شوپیاں کے مختلف دکانداروں کا معائنہ کرکے زائد المعیاد اشیاء اور خراب دودھ، سبزیوں کو ضبط کر لیا۔
اس دوران عہدیداروں نے قوانین کی خلاف ورزی کرنے والے خصوصاً ریٹ لسٹ کے بغیر اشیاء فروخت کرنے والے دکانداروں سے 9700روپے کا جرمانہ وصول کیا۔
محکمہ امور صارفین کے اسسٹنٹ ڈائریکٹر نے بتایا کہ مارکیٹ چیکنگ کے دوران قصبہ شوپیاں میں انہوں نے قریب 270 دکانوں کا معائنہ کیا جن میں میوہ فروش، قصاب، سبزی اور دودھ فروشی کی دکانیں شامل ہیں۔
انہوں نے کہا کہ زائد المعیاد اشیاء سمیت خراب سبزی، دودھ اور بیکری کو موقع پر ہی ضائع کیا گیا جبکہ دکانداروں سے آئندہ ایسا کرنے سے پرہیز کرنے کے لیے متنبہ کیا گیا۔
اسسٹنٹ ڈائریکٹر کے مطابق ’’امور صارفین و عوامی تقسیم کاری محکمہ کی جانب سے ضلع کے مختلف علاقوں کے بازاروں میں قریبا ہر روز چیکنگ کی جاتی ہے تاکہ صارفین کو صاف اور بہتر اشیاء خصوصا غذائی اجناس مناسب قیمتوں پر دستیاب ہو سکیں۔‘‘