چار روز بعد شوپیان میں انٹرنیٹ خدمات بحال

شوپیان میں گذشتہ چار روز کے دوران دو انکاؤنٹر پیش آئے ہیں۔ جن میں آٹھ عسکریت پسند ہلاک جبکہ فوجی اہلکار بھی زخمی ہوئے ہیں۔

جنوبی کشمیر کے ضلع شوپیان میں چار روز بعد موبائل انٹرنیٹ خدمات کو بحال کیا گیا ہے۔ شوپیان میں 8 اپریل کو جان محلہ میں سکیورٹی فورسز اور عسکریت پسندوں کے مابین انکاونٹر کے دوران موبائل انٹرنیٹ خدمات کو بند کر دیا گیا تھا۔ جس کے بعد آج بحال کیا گیا ہے۔

ضلع شوپیان میں گذشتہ چار روز کے دوران دو انکاؤنٹر پیش آئے ہیں۔ جن میں آٹھ عسکریت پسند ہلاک جبکہ کچھ فوجی اہلکار بھی زخمی ہوئے ہیں۔

ضلع کے چتراگام علاقے میں گزشتہ روز ہوئے انکاؤنٹر میں تین مقامی عسکریت پسند ہلاک ہوئے ہیں جبکہ دو فوجی اہلکاروں کو بھی گولیاں لگی ہیں۔ جن میں سے ایک اہلکار کو علاج کے لیے بادامی باغ سرینگر منتقل کیا گیا۔

واضح رہے کہ مارے گئے عسکریت پسندوں میں ایک 16 سالہ نابالغ عسکریت پسند جو چار بہنوں کا اکلوتا بھائی تھا بھی شامل ہے۔ جس نے چار روز قبل ہتھیار اٹھائے تھے۔