نامعلوم بندوق برداروں کی فائرنگ میں سرکاری ملازم ہلاک

جنوبی کشمیر کے ضلع شوپیاں میں نامعلوم بندوق برداروں نے محکمہ دیہی ترقی میں یومیہ اجرت پر کام کر رہے عارضی ملازم کو گولی مار کر ہلاک کر دیا۔

ذرائع کے مطابق نامعلوم بندوق برداروں نے ضلع کے نیل ڈورہ علاقے میں ایک نوجوان پر گولیاں چلائیں جسکی وجہ سے وہ شدید طور پر زخمی ہوا۔

نوجوان کو زخمی حالت میں ضلع ہسپتال شوپیان علاجِ و معالجے کے لیے پہنچایا گیا تاہم ڈاکٹروں نے نازک حالت کے چلتے اسے سرینگر کے ایس ایچ ایم ایس اسپتال منتقل کردیا جہاں وہ زخموں کی تاب نہ لا تے ہوئے دم تھوڑ بیٹھا۔

ہلاک شدہ نوجوان کی شناخت سبزار احمد نائیکو ولد عبدالرشید نائیکو کے طور پر ہوئی ہے اور وہ محکمہ دیہی ترقی میں یومیہ اجرت پر کام کر رہا تھا۔

واقعے کے بعد حفاظتی اہلکاروں نے نیل ڈورہ علاقے کو محاصرے میں لیکر حملہ آوروں کی تلاش شروع کر دی ہے۔