اراضی تنازعہ پر خاتون کا قتل

woman murdered in ramban over land dispute رام بن ضلع کے گول علاقہ میں اُس وقت کہرام مچ گیا جب اراضی تنازعہ کے دوران دو افراد نے ایک 52سالہ خاتون کا زد و کوب کرکے اسے قتل کر دیا۔

رام بن (جموں کشمیر) :صوبہ جموں کے پہاڑی ضلع رام بن میں اراضی تنازعہ ایک خاتون کے قتل کا سبب بنا۔ اطلاعات کے مطابق یہ سانحہ ضلع کے سب ڈویژن گول علاقہ میں اُس وقت پیش آیا بدھ کی صبح قریب 9 بجے دورافتاد علاقہ سیری پورہ، ٹھٹھارکہ میں دو فریقوں کا اراضی کے معاملہ میں تنازعہ شروع ہوا۔ مقامی باشندوں کے مطابق تنازعہ گالم گلوچ اور پھر ہاتھا پائی پر اترا آیا، اور ایک 52سالہ سلیمہ بیگم زوجہ عبد المجید کو فریق ثانی نے مار پیٹ کر موت کے گھاٹ اتار دیا۔

مقتولہ کے شوہر عبد المجید نے میڈیا نمائدوں کو بتایا کہ اراضی تنازعہ کے دوران وہ اور اس کی زوجہ مائے موقع پر ہی تھے جب فریق ثانی مستر احمد اور فاروق احمد پسران محمد ابراہیم ماگرے نے ان کی زوجہ کے ساتھ نہ صرف بدتمیزی کی بلکہ اسے گھسیٹ کر سڑک پر لے گئے اور اس کا زد و کوب کیا۔ انہوں نے مزید کہا کہ کسی طرح وہ خون میں لت پت اپنی زوجہ کو مقامی باشندوں کی مدد سے سنگلدان اسپتال پہنچا پائے تاہم وہاں موجود ڈاکٹروں کے مطابق اسپتال پہنچانے سے قبل ہی خاتون کی موت واقع ہو چکی تھی۔

مقامی پولیس کو اطلاع موصول ہوتے ہی پولیس نے مقتولہ کی جسد خاکی کو ضلع ہسپتال رام بن پوسٹ مارٹم کے لیے منتقل کیا۔ پولیس اہلکاروں کا کہنا ہے کہ رام بن ضلع اسپتال میں قانونی و طبی لوازمات کی تکمیل کے بعد میت کو آخری رسومات کے لیے وارثین کے سپرد کر دیا گیا۔ رام بن پولیس نے کیس درج کرکے معاملہ کی تفتیش شروع کر دی ہے جبکہ مقامی لوگوں کی نشاندہی اور گواہی کے پیش نظر انہوں نے ملزمین کو حراست میں لے لیا ہے۔ معلوم ہوا ہے کہ حراست میں لئے گئے افراد محکمہ پولیس میں کام کر رہے ہیں۔

مقامی باشندوں نے بتایا کہ حادثہ کے فوراً بعد دونوں ملزمان اپنی نجی گاڑی میں سوار ہوکر موقع سے فرار ہو گئے تاہم پولیس نے انہیں دھرم کنڈ سے حراست میں لے لیا۔ پولیس نے بتایا کہ انہوں نے قتل کا معاملہ درج کر کرکے مزید تفتیش شروع کر دی ہے۔