رامبن: بارش کے سبب مکان اور قبرستان کو جزوی نقصان

جموں و کشمیر کے ضلع رام بن میں شدید بارشوں اور بادل پھٹنے سے رہائشی اور زیر تعمیر مکان کے علاوہ مقامی قبرستان کو بھی جزوی نقصان پہنچا۔

پہاڑی ضلع رام بن میں شدید بارش کے سبب چندر کوٹ علاقے میں ایک قبرستان سمیت دو مکانات کو جزوی نقصان پہنچا ہے۔

مقامی باشندوں کے مطابق تیز بارشوں اور بادل پھٹنے کے سبب پانی کے تیز بہاؤ سے ایک رہائشی مکان کی دیوار اور ایک زیر تعمیر مکان کو نقصان پہنچا ہے۔

انہوں نے بتایا کہ دوران شب بادل پھٹنے کے سبب پانی کے تیز بہاؤ میں زیر تعمیر مکان کا تعمیراتی مواد ڈھ گیا۔ اس کے علاوہ مقامی قبرستان کو بھی نقصان پہنچا ہے۔

متاثرہ افراد نے حیرانگی کا اظہار کرتے ہوئے کہا کہ کسی بھی انتظامی افسر نے علاقے کا دورہ نہیں کیا۔ انہوں نے کہا کہ مقامی سرپنچ محض دورہ کر کے چلے گئے۔

انہوں نے اعلیٰ حکام سے متاثرین کی امداد اور بازآبادکاری کی اپیل کی ہے۔