ڈی ڈی سی انتخابات: پرچہ نامزدگی کا سلسلہ بدستورجاری

جموں و کشمیر کے ضلع رامبن کے اے اور بی بلاک سے کانگریس پارٹی نے اپنے دو امیدوار کی پرچہ نامزدگی داخل کرائی ہے۔

مرکز کے زیر انتظام جموں کشمیر کے ضلع رامبن میں چوتھے مرحلے کے تحت دو نسشت پر ہونے والے ڈسٹرکٹ ڈیولپمنٹ کونسل انتخابات کی سرگرمیاں عروج پر ہیں۔

کانگریس پارٹی نے اپنےدو امیدوار کی پرچہ نامزدگی بلاک رامبن 'اے' سے سابق ضلع صدر ایڈووکیٹ ارون سنگھ راجو اور رامبن حلقہ 'بی' سے سرپنچ کیرتی لتا کی سینکڑوں پارٹی کارکنان کے ہمراہ بلاک دفتر میں جمع کرائی ہے۔

پرچہ نامزدگی داخل کرنے کے بعد دونوں امیدواروں نے کہاکہ' وہ انتخابی میدان میں صرف اس لیے اترے ہیں تاکہ جیت کر وہ لوگوں کے بنیاد مسائل، روزگار اور بڑھتی مہنگائی جیسے اہم معاملوں پر بات کریں۔ وہیں کانگریس پارٹی کے ترجمان و سابق ایم ایل اے اشوک کمار نے کہا کہ' کانگریس بھارتیہ جنتا پارٹی کے آپسی تقسیم کے ناپاک ارادے کو کامیاب نہیں ہونے دیگی۔ یہ اپنے مفاد کے لیے لوگوں کو مذہب کے نام پر تقسیم کرتی ہے۔

انہوں نے کہا کہ کانگریس پارٹی نے انتخابی میدان میں تعلیم یافتہ امیدوار اتارے ہیں جن کی جیت طے ہے۔ ضلع میں سابق وزیر اعلیٰ آزاد صاحب کے دوران میں ہی تعمیر و ترقی کے کام ہوئے ہیں پچھلے چھ برسوں سے پورے ضلع میں ترقی کے نام پر ایک بھی کام نہیں ہو ا ہے۔

انہوں نے یہ بھی کہاکہ'کانگریس پارٹی جموں و کشمیر کو ریاست کا درجہ دلانے، آپسی بھائی چارہ قائم کرنے اور زمین کو تحفظ فراہم کرانے کے لیے جدوجہد جاری رکھے گی۔ کانگریس پارٹی امن شانتی بھائی چارہ کے ساتھ سب کو ساتھ لے کر انتخاب لڑ کر جیت حاصل کرے گی۔