جموں (جموں و کشمیر) :سرکاری ذرائع نے بتایا کہ صوبہ جموں کے رام بن ضلع میں کیفٹریا موڑ کے نزدیک سرینگر جموں قومی شاہراہ پر ایک زیر تعمیر ٹنل کو بھاری بھر کم مٹی کا تودا گر آنے سے نقصان پہنچا ہے۔ انہوں نے بتایا کہ اس حادثہ میں کسی قسم کا کوئی جانی نقصان نہیں ہوا ہے تاہم انہوں نے دعویٰ کیا کہ مٹی کا تودا گر آنے سے زیر تعمیر ٹنل کو بھی معمولی نقصان پہنچا ہے۔
دریں اثنا کیفٹیریا موڑ پر چٹانیں کھسک آنے کے باوجود وادی کشمیر کو صوبہ جموں سمیت ملک کے باقی حصوں کے ساتھ جوڑنے والی سرینگر جموں قومی شاہراہ پر درماندہ گاڑیوں کی نقل و حمل جاری ہے تاہم لوگوں سے کہا گیا ہے کہ وہ قومی شاہراہ پر سفر اختیار کرنے سے قبل ٹریفک حکام کے ساتھ رابطہ کریں۔ بتا دیں کہ قومی شاہراہ بدھ کے روز رام بن ضلع میں ناشری اور بانہال کے درمیان مٹی کے تودے گر آنے کے سبب کئی گھنٹوں تک بند رہی۔ ادھر، سرینگر- لیہہ شاہراہ اور جنوبی کشمیر کے ضلع شوپیاں کو صوبہ جموں کے پونچھ اور راجوری اضلع کے ساتھ جوڑنے والے تاریخی مغل روڈ پر ٹریفک کی نقل و حمل حسب معمول جاری ہے۔