رام بن میں سی آر پی ایف اہلکار کی خودکشی

ضلع رام بن کے سی آر پی ایف کیمپ میں اہلکاروں نے ایک ساتھی کی لاش خون میں لت پت پڑی دیکھی جس کے بعد انہوں نے فوری طور اسے ضلع اسپتال پہنچایا۔

جموں و کشمیر کے ضلع رام بن میں منگل کی صبح ایک سی آر پی ایف اہلکار نے خود کشی کرلی۔ اطلاعات کے مطابق 84 بٹالین سی آر پی ایف سے وابستہ ایک اہلکار نے منگل کی صبح ضلع کے چندرکورٹ، بوم کے مقام پر خود کو گولی مارکر اپنی زندگی کا خاتمہ کرلیا۔

سی آر پی ایف کیمپ میں گولی چلنے کی آواز سنائی دینے کے بعد کیمپ میں بھگدڑ مچ گئی۔ اہلکاروں نے ایک ساتھی کی لاش خون میں لت پت پڑی دیکھی جب کہ قریب میں ہی اس کی سروس رائفل بھی موجود تھی۔

انہوں نے اہلکار کو فوری طور پر ضلع اسپتال رام بن پہنچایا جہاں معالجین نے اسے مردہ قرار دے دیا۔

اہلکار کی شناخت کانسٹیبل رنجیو رنجن سنگھ (30) ولد چندرکہ سنگھ ساکن گاؤنگری، بہار کے طور پر ہوئی ہے۔

قانونی و طبی کارروائی کے بعد لاش کو بٹالین کے کمانڈنٹ کے سپرد کردیا گیا۔ اس ضمن میں پولیس اسٹیشن چندرکورٹ میں 174 سی آر پی سی کے تحت مقدمہ درج کرلیا گیا۔