چنار کے درخت تباہی کے دہانے پر

لوگوں کا مطالبہ ہے کہ ضلع انتظامیہ خاص طور سے ضلع ترقیاتی کمشنر رامبن کو اس جانب توجہ دینی چاہیے.

جموں کشمیر کی شان "چنار" کو حکومت کی سرپرستی کے تحت محفوظ درخت قرار دے کر اسکے فروغ کیلیے ایک اتھارٹی قائم کی گئی تھی لیکن اس کے باوجود رامبن کے صدر مقام قصبہ میں انتظامیہ کی ناک کے نیچے چنار کے درجنوں درختوں کو تباہی کے دہانے پر پہنچا دیا ہے۔

صاحب دل اور نیک سیرت افراد نے سرکاری اداروں کے صحنوں میں عام لوگوں کو گرمی کی شدت سے بچانے کے لیے چناروں کی شجر کاری کی تھی۔

مقامی لوگوں کا کہنا ہے کہ ضلع ہسپتال، پرانا کمپلیکس ڈاک بنگلہ اور بس اڈے پر موجود درجنوں چنار کے درختوں کو نیست نابود کر دیا گیا ہے جبکہ محکمہ مال اور ضلع انتظامیہ کے افسر خواب خرگوش میں مست ہیں۔

لوگوں کا مطالبہ ہے کہ ضلع انتظامیہ خاص طور سے ضلع ترقیاتی کمشنر رامبن کو اس جانب توجہ دینی چاہیے۔

واضح رہے کہ حکومت نے چنار ڈیولپمنٹ اسکیم کے تحت سنہ 2002 میں ایک سروے شروع کیا تھا جو 2008 میں مکمل ہوا تھا۔

اس سروے کے مطابق جموں کشمیر میں چنار کے 38401 درخت موجود تھے جن میں 12409 ضلع اننت ناگ میں پائے گئے جبکہ سنہ 1971 میں خطے میں چناروں کی تعداد 47 ہزار تھی۔