Road Safety Week 2023 رامبن میں روڈ سیفٹی ویک کے تحت بیداری مہم کا آغاز

وادیٔ کشمیر کے مختلف اضلاع کی طرح ضلع رامبن میں بھی سڑک حادثات پر قابو پانے کے لئے روڈ سیفٹی ویک کا انعقاد کیا گیا۔ ضلع رامبن کے چندر کورٹ قومی شاہراہ پر روڈ سیفٹی ویک کے تحت بیداری مہم کا آغاز کیا گیا۔ road safety week in Ramban

رامبن:مرکزی زیر انتطام جموں و کشمیر کے ضلع رامبن میں شاہرہ پر سڑک حاثات پر روک تھام لگانے کے لیے اسسٹنٹ ریجنل ٹرانسپورٹ افسر رامبن سمریندر سنگھ نے ضلع رامبن کے چندر کورٹ قومی شاہراہ پر 'روڈ سیفٹی ویک 2023 اور سوچھتا پکھواڑہ کی تقریبات کا آغاز کیا تاکہ نوجوانوں، ڈرائیوروں، اور مقامی آبادی کو سڑک کی حفاظت کے اصولوں اور ذاتی حفظان صحت اور صفائی کی اہمیت کے بارے میں آگاہ کیا جاسکے۔ اس موقع پر دیگر موٹر ویکل ڈپارٹمنٹ کے انسپکٹر، میڈیکل ٹیم، ٹرانسپورٹس ڈرائیورز، کنڈکٹرز کے علاوہ مقامی لوگ کثیر تعداد میں موجود تھے۔ بیداری پروگرام کا افتتاح کرنے کے بعد، اے آر ٹی او سمریندر سنگھ نے سڑک کی حفاظت کے مختلف پہلوؤں اور ایک فرد کی جان بچانے میں سیٹ بیلٹ و ہیلمٹ پہننے کی اہمیت پر بھر پور روشنی ڈالی۔

انہوں نے ٹریفک قوانین اور اصولوں پر سختی سے عمل کرنے کی ضرورت پر زور دیا اور روڈ سیفٹی کے اصولوں اور ضوابط کے بارے میں آگاہی پھیلانے کے لیے ضلع انتظامیہ کی جانب سے مکمل تعاون کا یقین دلایا۔ انہوں نے ٹریفک قوانین کو عملی جامہ اور لاگو کرنے میں عام شہریت کی ذمہ داریوں پر بھی روشنی ڈالی۔ انہوں نے بتایا کہ جاری روڈ سیفٹی ہفتہ کے دوران مختلف معلوماتی سرگرمیوں کا انعقاد کیا جائے گا جن میں ہیلتھ چیک اپ کیمپ اور گاڑیوں کی چیکنگ شامل ہیں۔ انہوں نے بتایا کہ ’روڈ سیفٹی ویک 2023 کے ایک حصہ کے طور پر سوچھتا پکھواڑہ مہم بھی چلائی جائے گی، جس کے تحت محکمہ دیگر اسٹیک ہولڈرز کے ساتھ مل کر مختلف مقامات پر صفائی مہم چلانے کے علاوہ کئی دیگر بیداری پروگرامز کا انعقاد کیا جائے گا۔'

انہوں نے کہا کہ جہاں پر زیادہ تر سڑک حادثات ہونے کا اندیشہ ہے وہاں جگہ جگہ بیداری کیمپ لگائیں گے۔ انہوں نے پہاڑی ضلع رامبن کی غیور عوام سے اپیل کی ہے کہ روڈ سیفٹی ایکٹ کے تحت قانون پر عمل کریں۔ انہوں نے کہا کہ قانون کے خلاف ورزی کر نے والے کو کسی بھی صورت میں بخشا نہیں جائے گا جو بھی لاپرواہی برتے گا اس کے خلاف قانونی کارروائی کی جائے گی۔ انہوں تمام شہریوں سے اپیل کی وہ ہیلمٹ، سیٹ بیلٹ لگا کر گاڑی چلائے اگر کوئی اس کے خلاف پایا جاتا ہے تو ان کے خلاف محکمہ سختی سے پیش آئے گی۔