Road Accident In Ramban رامبن سڑک حادثے میں انڈین ائر فورس میں تعینات جوان ہلاک

رامبن کے ماروگ علاقہ میں ایک سڑک حادثہ میں انڈین ائر فورس میں تعینات جوان ہلاک ہوگیا ہے۔ وہیں بانہال کے چملواس مقام پر ایک ٹیمپو گاڑی گرتے پتھروں کی زد میں آگئی۔ اس حادثہ میں دو خواتین سمیت تین غیر مقامی افراد زخمی ہوئے ہیں۔

رامبن: جموں وکشمیر کے ضلع رامبن کے ماروگ علاقے میں ایک سڑک حادثے میں انڈین ائر فورس میں تعینات جوان کی برسر موقع ہی موت واقع ہوئی۔سرکاری ذرائع نے بتایا کہ رامبن کے ماروگ علاقے میں ایک آئی 20 کار سڑک سے لڑھک کر گہری کھائی میں جا گری جس کے نتیجے میں ایک شخص کی بر سر موقع ہی موت واقع ہوئی۔انہوں نے کہا کہ حادثہ پیش آنے کے بعد پولیس، کیو آر ٹی رامبن کے رضا کاروں نے بچاؤ آپریشن شروع کرکے لاش کو کھائی سے باہر نکالا۔متوفی کی شناخت سرفراز احمد بٹ ساکن کولگام کشمیر کے بطور کی گئی ہے۔دریں اثنا پولیس نے اس سلسلے میں ایک کیس درج کرکے تحقیقات شروع کی ہیں۔

وہیں بانہال کے چملواس علاقے پر ایک ٹیمپو ٹرولر گرتے پتھروں کی زد میں آنے سے دو خواتین سمیت تین غیر مقامی افراد زخمی ہوئے۔پولیس ذرائع نے بتایا کہ زخمیوں کو جی ایم سی اننت ناگ منتقل کیا گیا ہے جہاں پر ایک خاتون کی حالت تشویشناک بنی ہوئی ہے۔پولیس نے زخمیوں کی شناخت لکشیت گھپتا ولد جے کے گھپتا ، میگا ستوگی زوجہ سوریہ کمار اور جے کے گھپتا ولد سوریہ گھپتا ساکنان میرٹھ اتر پردیش کے بطور کی ۔

ایک پولیس اہلکار نے بتایا کہ تینوں کا تعلق یوپی سے ہے اور ان کے سر پر چوٹیں آئی ہیں۔ انہیں ایمرجنسی ہسپتال بانہال منتقل کیا گیا جہاں سے انہیں مزید علاج کے لیے جی ایم سی، اننت ناگ ریفر کر دیا گیا۔ پولیس نے زخمیوں کی شناخت 10 سالہ لکشیت گپتا، 55 سالہ میگا رستوگی اور 35 سالہ جے کے گپتا کے طور پر کی ہے - یہ سبھی اتر پردیش کے میرٹھ سے ہیں۔

واضح رہے کہ سنہ 2022 میں سرینگر جموں قومی شاہراہ (نیشنل ہائی وے 44) پر 648 سڑک حادثات رونما ہوئے ہیں، ان حادثات میں 93 افراد نے اپنی جان گنواں دی ہیں۔ہم آپ کو بتادیں کہ ٹریفک پولیس جموں و کشمیر کے مطابق جموں و کشمیر میں 2010 سے 2022 کے درمیان 76 ہزار 942 سڑک حادثات رونما ہوئے ہیں جن میں 12 ہزار429 افراد ہلاک ہوئے ہیں، جب کہ 1 لاکھ 4 ہزار 983 افراد زخمی ہوئے ہیں۔

واضح رہے کہ ملک بھر میں سڑک حادثات کی وجہ سے ہزاروں افراد اپنی قیمتی جانیں گنوارہے ہیں۔ اور ہزاروں افراد سڑک حادثات میں شدید زخمی ہون کی وجہ سے معذوری کی زندگی گذارنے پر مجبور ہیں۔ سڑک حادثات کی اہم وجوہات میں لاپرواہی سے گاڑی چلانا، نشہ کی حالت میں گاڑی چلانا، انتہائی تیز رفتاری سے گاڑی چلانا وغیرہ شامل ہیں۔ متعلقہ محکمہ کی جانب سے آئے دن اس ضمن میں شعور بیداری مہم بھی چلائی جاتی ہے۔ ہائی ویز پر جگہ جگہ ڈرائیورنگ کے دوران احتیاط برتنے کی ہدایات پر مبنی بورڈ لگائے گئے ہیں لیکن اس کے باوجود سڑک حادثات میں کمی کے بجائے دن بہ دن اضافہ ہی ہوتا جارہا ہے۔

(یو این آئی )