Husband wife duo found dead راجوری میں میاں بیوی کی گلا کٹی لاشیں برآمد

راجوری ضلع کے کنڈی علاقے میں منگل کے روز میاں بیوی کی گلا کٹی لاشیں برآمد ہوئی ہیں۔ پولیس نے لاشوں کو برآمد کرکے قانونی کارروائی شروع کی۔

راجوری:جموں وکشمیر کے راجوری ضلع کے کنڈی علاقے میں منگل کے روز میاں بیوی کی گلا کٹی لاشیں برآمد ہوئی ہیں۔
اطلاعات کے مطابق راجوری کے کنڈی علاقے باگلہ گاؤں میں منگل کے روز اس وقت سراسیمگی دوڑ گئی جب میاں بیوی کی گلا کٹی لاشیں رہائشی مکان سے برآمد کی گئیں۔

تفصیلات کے مطابق 55 سالہ محمد عاظم ولد محمدخان اور ان کی 50 سالہ اہلیہ گلزار بیگم ساکن کنڈی اپنے مال مویشی کے ساتھ اپنی ڈھوک( سیزنل مکان) میں موجود تھے اور اسی دوران آج وہ اپنے ڈھوک میں پراسرار حالت میں مردہ پائے گئے تھے۔اطلاع ملتے ہی پولیس کی ایک ٹیم علاقہ کی طرف روانہ ہوئی۔ یاد رہے کے یہ علاقہ پہاڑی ہے اور موسم خراب ہونے کے سبب اس مقام تک پہنچنے میں پولیس کو کافی دشواری پیش آرہی ہے۔
معلوم ہوا ہے کہ مقامی لوگوں نے پولیس کو اس بارے میں مطلع کیا، چنانچہ پولیس کی اعلیٰ سطحی ٹیم جائے موقع پر پہنچی اور لاشوں کو تحویل میں لے کر طبی لوازمات کی خاطر انہیں ہسپتال منتقل کیا۔
پولیس کے ایک سینیئر آفیسر نے بتایا کہ ابتدائی تحقیقات کے دوران پتہ چلا ہے کہ میاں بیوی کا سنسنی خیز طریقے سے قتل کیا گیا ہے۔
انہوں نے بتایا کہ یہ ایک انسانیت سوز واقع ہے اور ملوثین کو کسی بھی صورت میں بخشا نہیں جائے گا۔
ذرائع نے بتایا کہ ایس ایس پی راجوری نے خصوصی تحقیقات ٹیم تشکیل دی ہے تاکہ قاتلوں کو جلدازجلد سلاخوں کے پیچھے دھکیل دیا جائے۔