Heroin Recovered in Rajouri راجوری میں چھاپہ ماری کے دوران منشیات فروش ہیرؤن سمیت گرفتار

سرحدی اضلاع راجوری اور پونچھ میں سکیورٹی فورسز نے منشیات کا کاروبار کرنے والوں کے خلاف بڑے پیمانے پر کریک ڈاؤن شروع کیا ہے۔ اس دوران کئی منشیات فروشوں کو گرفتار کیا ہے۔

راجوری:جموں وکشمیر کے راجوری ضلع کے جرالان گاؤں میں پولیس نے چھاپہ ماری کے دوران منشیات فروش کی گرفتاری عمل میں لاکر اس کے قبضے سے ہیرؤن برآمد کی۔ پولیس ذرائع نے بتایا کہ مصدقہ اطلاع موصول ہونے کے بعد ڈی ایس پی ہیڈکواٹر کی سربراہی میں پولیس ٹیم نے راجوری کے دھنور جرالان گاؤں میں رہائشی مکان پر چھاپہ مارا اور وہاں تلاشی کے دوران آٹھ گرام ہیرؤن جیسی ممنوع نشیلی اشیاء برآمد کی۔معلوم ہوا ہے کہ پولیس نے منشیات فروش کو بھی دھر دبوچ کر سلاخوں کے پیچھے دھکیل دیا ہے۔

واضح رہے کہ سکیورٹی فورسز نےپونچھ کے سرحدی علاقے کھڑی کرماڑا میں مشتبہ نقل وحرکت کے بعد فائرنگ کرکے ایک منشیات اسمگلر کو زخمی کردیا۔ زخمی اسمگلر کو علاج ومعالجہ کی خاطر نزدیکی ہسپتال منتقل کیا گیا۔دفاعی ذرائع نے بتایا کہ منشیات اسمگلر کے قبضے سے ممنوعہ نشیلی اشیاء سے بھرا ایک پیکٹ برآمد ہوا ہے۔ واضح رہے کہ راجوری اور پونچھ اضلاع میں سکیورٹی فورسز نے منشیات کا کاروبار کرنے والوں کے خلاف بڑے پیمانے پر کریک ڈاؤن شروع کیا ہے۔پولیس نے عوام الناس سے اپیل کی ہے کہ وہ منشیات کا کاروبار کرنے والوں کے بارے میں قانون نافذ کرنے والے ادارے کو مطلع کریں، تاکہ اس غیر قانونی کاروبار میں ملوث افراد کو قانون کے کٹہرے میں کھڑا کیا جاسکے۔