راجوری پریس کلب میں انجمن اردو صحافت کی جانب سے تربیتی ورکشاپ کا انعقاد Anjuman e Sahafat

اس ورکشاپ Workshop میں سرکردہ صحافی یوسف جمیل صاحب نے''صحافتی اخلاقیات اور ذمہ داریاں'' کے موضوع پر تفصیلی روشنی ڈالتے ہوئے کہا کہ 'ذمہ دار صحافی Journalist ہی ایک بہتر معاشرے کی تشکیل میں صحت مند رول ادا کرسکتا ہے۔'

انجمن اردو صحافت جموں وکشمیر کی جانب سے اتوار کو ایوان ِ صحافت راجوری (پریس کلب راجوری، Press Club Rajouri) میں خطہ پیر پنچال کے عامل صحافیوں کے لئے”دور ِجدید میں صحافت Journalism کے بدلتے تقاضے کے موضوع پر ایک تربیتی ورکشاپ Training Workshop کا انعقاد کیا گیا۔

دو نشستوں پر مشتمل ورکشاپ کے دوران عالمی شہرت یافتہ صحافی یوسف جمیل صاحب نے ”صحافتی اخلاقیات اور ذمہ داریاں ‘ کے موضوع پر تفصیلی روشنی ڈالتے ہوئے کہا کہ ذمہ دار صحافی ہی ایک بہتر معاشرے کی تشکیل میں صحت مند رول ادا کرسکتا ہے۔

انہوں نے اپنے تجربات اور مشاہدات کی روشنی میں عامل صحافیوں پر زور دیا کہ وہ معیاری صحافت یقینی بنانے کے لئے غیر جانبداری، احساس ذمہ داری، برد باری اور تحمل مزاجی کا مظاہرہ کریں اور خبروں کو اپنے قارئین، ناظرین اور سامعین تک پہنچانے کے عمل میں اپنی پسند اور ناپسند کو درکنار رکھ کر صرف حقائق بیان کرنے تک ہی اپنے رول کو محدود رکھیں۔

سرکردہ صحافی ریاض مسرور نے عملی مشق کے ذریعے عامل صحافیوں کو جدید صحافت کے تقاضوں سے روشناس کرایا۔ انہوں نے ڈیجیٹل صحافت کو صحافت کا مستقبل قرار دیتے ہوئے کہا کہ عامل صحافیوں کو اپنے آپ کو آج سے ہی خود کو اس کے لئے تیار کرنا چاہیے۔

ریاض مسرور نے ویڈیو جرنلزم کے فارمیٹ انتہائی سلیس انداز میں بیان کرتے ہوئے معیاری صحافت کی صحت برقرار رکھنے کے پیمانے مدلل انداز میں بیان کئے۔

سینئر صحافی ہارون ریشی نے ”خبر نگاری کا صحافتی اسلوب “ کے موضوع پر روشنی ڈالتے ہوئے کہا کہ اگرچہ صحافت کے بنیادی اصول تبدیل نہیں ہوتے ہیں، تاہم بدلتے وقت کے ساتھ خبر نگاری کے تقاضے بدلتے رہتے ہیں اور ہمیں اپنے آپ کو ان تقاضوں سے ہم آہنگ کرنا چاہیے، تاکہ ہمارا صحافتی سفر جمود کا شکار نہ ہو۔

ورکشاپ میں خطہ پیر پنچال اور جموں کے کم وبیش 60 عامل صحافیوں نے شرکت کی۔ ورکشاپ کی نظامت کے فرائض حسین محتشم نے انجام دیے جب کہ پریس کلب راجوری کی طرف سے ایڈووکیٹ تعظیم ڈار اور عمر ارشد ملک نے بھی اپنے خیالات کا اظہار کیا۔

انجمن کے نائب صدر عشرت حسین بٹ نے ورکشاپ کے مقصد پر تفصیلی روشنی ڈالی جب کہ تقریب کے آخر میں صدر ِ انجمن ریاض ملک نے تمام مہمانوں اور شرکاء کے علاوہ راجوری پریس کلب کا شکریہ ادا کرتے ہوئے اعلان کیا کہ جنوری میں انجمن تنظیمی انتخابات سے قبل خطہ چناب کے لئے بٹوت رام بن میں تربیتی ورکشاپ منعقد کرے گی۔ شرکاء کو انجمن اردو صحافت جموں و کشمیر کی جانب سے سندِ شرکت سے نوازا گیا۔