راجستھان کے دارالحکومت جے پور کے بنی پاک علاقے کے آرمی کینٹین کے قریب واقع مسجد میں جمعہ کی نماز ادا نہیں کرنے دینے پر نمازیوں نے انتظامیہ کے خلاف احتجاج کیا ہے۔
دراصل لاک ڈاؤں کے بعد سے ہی یہاں آرمی کے علاقے میں تمام مذہبی مقامات کو بند کرنے کا اعلان کیا گیا تھا، جس کے بعد سے ابھی تک اس علاقے میں نہ مندر کھولے گئے ہیں اور نہ ہی کوئی مسجد کھولی گئی ہے۔ آج جب جمعہ کی نماز ادا کرنے کے لیے نمازی یہاں پر پہنچے تو مسجد میں تالا لگا دیکھ کر نمازی مظاہرہ کرنے لگے۔
اس دوران کسی نے علاقے کے پولیس تھانے میں اطلاع دی جس کے بعد پولیس موقع پر پہنچی۔ بعد ازاں آرمی کے جوانوں اور پولیس اہلکاروں نے نمازیوں کو سمجھا کر واپس کیا۔
واضح رہے کہ گزشتہ دو تین جمعہ کو بھی نمازیوں نے یہاں پر احتجاج کیا تھا لیکن اس مرتبہ کسی نے ویڈیو اور فوٹو سوشل میڈیا پر وائرل کر دی جس کے بعد لوگ بڑی تعداد میں موقع پر جا پہنچے۔ بہرحال یہ مسجد کب کھلتی، اس بارے میں فی الحال کچھ کہا نہیں جا سکتا۔
یہ بھی پڑھیں: جے پور کے مسلم مسافر خانہ کی حالت بدتر
