گووند سنگھ ڈوٹاسرا نے بتایا کہ سابقہ حکومت کے وقت بہت سے اردو اساتذہ کو ایسے اسکولوں میں تعینات کردیا گیا جہاں اردو طلبا کی تعداد صفر تھی، اس پر ریاستی حکومت نے اردو مضامین کے طلبا و طالبات کے داخلے کے اعداد و شمار حاصل کرکے تبدیلی کی پہل کی ہے۔
انہوں نے کہا کہ گزشتہ حکومت نے اردو مضامین کے طلبا و طالبات کے ساتھ امتیازی سلوک کرتے ہوئے اردو اساتذہ کی غلط تقرری کردی تھی۔
اردو زبان کے استاد اب اردو اسکولوں میں ہی مقرر ہوں گے۔ اس سے طلبا کو اردو اساتذہ کا فائدہ ملے گا۔
ڈوٹاسرا کی ہدایت پر جمعہ سے ہی مربوط شالہ پورٹل پر الگ سے 'اسٹاف كورنر' کی شروعات ہوئی ہے۔
انہوں نے کچھ دن پہلے ہی اس سلسلے میں اعلان کر کے ہدایات دی تھی کہ اساتذہ اور اہلکاروں کے مسائل کو آن لائن حل کیا جائے تا کہ انہیں غیر ضروری طور پر ملازمت سے متعلق اپنے کام کاج کے لیے حکام اور دفاتر کے چکر نا لگانا پڑے۔
انہوں نے بتایا کہ پورٹل کے ذریعے اساتذہ کو یہ بھی پتہ لگ سکے گا کہ ان کی شکایت فی الحال 'اسٹاف کورنر' میں کس سطح پر ہے۔
انہوں نے بتایا کہ تبادلے اور سروس ریکارڈ سمیت دیگر اطلاعات بھی اس پورٹل پر ہی ملیں گی، اس کے لیے اساتذہ خود لاگ ان آئی ڈی بھی بنا سکتے ہیں۔