صوفی حضرت خواجہ معین الدین چشتی رحمتہ اللہ علیہ کے 809 ویں عرس مبارک کے موقع پر خاص اور عام زائرین کی طرف سے چادر پوشی کی جا رہی ہے، ایسے میں اب مرکزی حکومت کی جانب سے بھی وزیر اعظم نریندر مودی کی جانب سے چادر16 فروری یعنی آج صبح 11 بجے دربار خواجہ میں پیش کی جائے گی۔
وزیراعظم کی جانب سے پیش کی جانے والی چادر کو مرکزی وزیر برائے اقلیتی امور مختار عباس نقوی خود لے کر اجمیر شریف پہنچیں گے۔ نقوی آج صبح ساڑھے نو بجے دہلی سے بذریعہ ہوائی جہاز اجمیر پہنچیں گے اور 10:30 بجے اجمیر کے کشن گڑھ ہوائی اڈے پر اتریں گے۔ گیارہ بجے خواجہ غریب نوازؒ کی درگاہ میں وزیراعظم نریندر مودی کی جانب سے چادر پیش کریں گے۔
اس کے علاوہ زیارت کے بعد مختار عباس نقوی درگاہ شریف میں کچھ نئی تعمیرات کا اجراء کریں گے۔ مختار عباس نقوی کے پروگرام کے سلسلے میں ضلعی پولیس نے حفاظتی انتظامات مکمل کر لیے ہیں۔