Jaipur Police Arrest Two Miscreants ڈکیتی کی واردات میں ملوث دو بدمعاش گرفتار، جے پور پولیس

جے پور کی کلواڑ پولیس نے پانچ دن قبل ہونے والی ڈکیتی کی واردات کی گھتی سلجھانے کا دعویٰ کرتے ہوئے اس معاملے میں دو بدمعاشوں کو گرفتار کر لیا ہے۔ پولیس نے بدمعاشوں کے پاس سے مسروقہ موبائل اور واردات میں استعمال ہونے والی گاڑی برآمد کر لی ہے۔

جے پور: ریاست راجستھان کے دارالحکومت جے پور میں ڈی سی پی (ویسٹ) وندیتا رانا نے میڈیا کو بتایا کہ پولیس نے مخبروں کی جانب سے ٹھوس جانکاری ملنے کے بعد خصوصی چھاپہ ماری مہم چلائی۔ پولیس نے اس مہم کے دوران دو بدمعاشوں کو گرفتار کرلیا۔ گرفتار افراد کی شناخت ملزم پون مینا ولد کیلاش چند گاؤں بارسنگھ پورہ کالڈیرا اور مکیش یادو ولد بنشیدھر کے طور پر ہوئی ہے جو کھپڑیا درگا باس کالڈیرہ کے رہنے والے ہیں۔

پولیس نے بتایا کہ جے پور میں راہگیروں سے موبائل چھیننے کے واقعات کو روکنے اور مجرموں کو گرفتار کرنے کے لئے ایڈیشنل ڈی سی پی رام سنگھ، اے سی پی پرمود سوامی اور کلواڑ پولیس افسر کی قیادت میں ایک ٹیم تشکیل دی گئی۔ ٹیم نے واقعے کے بعد آس پاس نصب سی سی ٹی وی کیمروں کی جانچ کی۔اس کی بنیاد پر پولیس نے دو بدمعاشوں کی نشاندہی کی اور انہیں پکڑ لیا۔ پولیس نے گرفتار ملزمان پون مینا اور مکیش یادو کو گرفتار کر کے ان کے قبضے سے لوٹی گئی موبائلیں برآمد کر لیں۔

پولیس نے مزید بتایا کہ بدمعاشوں نے قصبہ کلواڑ سمیت دو دیگر مقامات پر لوٹ مار کی وارداتوں کو انجام دے چکے ہیں۔ملزم پون مینا ماضی میں بھی گاڑی چوری اور موبائل چھیننے کی وارداتیں انجام دے چکا ہے۔ پولیس کا مزید کہنا تھا کہ ملزمان کے خلاف تھانہ چومو، کردھانی میں ڈکیتی اور چوری کے 6 مقدمات درج ہیں۔ پولیس گرفتار ملزمان سے پوچھ گچھ اور دیگر معلومات اکٹھی کر رہی ہے۔