راجستھان کے اجمیر میں آج حضرت سید سالار مسعود غازی رحمۃاللہ کی انتظامیہ کمیٹی کی جانب سے اس نیوز چینل اور اس کے اینکر کی مذمت کرتے ہوئے اس کے خلاف سخت کاروائی کا مطالبہ کیا گیا ہے۔
درگاہ حضرت سید سالار مسعود غازی رحمۃاللہ کی انتظامیہ کمیٹی کے صدر سید شمشاد احمد ایڈووکیٹ نے کہا 'ایک ٹی وی نیوز چینل کے اینکر نے حضرت خواجہ معین الدین چشتی اجمیری رحمۃاللہ علیہ کی شان میں قابل اعتراض جملے کا استعمال کیا ہے جس کی ہم سخت مذمت کرتے ہیں اور مرکزی حکومت سے مطالبہ کرتے ہیں کہ ایسے نیوز اینکر کے خلاف مقدمہ درج کر کے اسے جیل روانہ کریں'۔
انہوں نے کہا کہ اس کے علاوہ چینل پر پابندی عائد کی جائے۔ ٹی آر پی کی لالچ میں یہ جو گستاخی کی گئی ہے وہ معافی کے لائق نہیں، خواجہ معین الدین چشتی کے در پر سبھی مذاہب (ہندو، مسلم، سکھ، عیسائی) کے لوگ آتے ہیں، یہ درگاہ ہندو مسلم یکجہتی کی جیتی جاگتی مثال ہے اور پوری دنیا سے لوگ یہاں آتے ہیں اور اپنی محبت و عقیدت کا نذرانہ پیش کرتے ہیں'۔
انہوں نے مزید کہا کہ 'ایسے عظیم بزرگ کی شان میں زہر اگلنا ان کے عقیدت مندوں کے جذبات کو ٹھیس پہنچانے کے ساتھ ساتھ ملک کے امن و امان کو بگاڑنے کی سازش ہے، ایسے لوگ ملک کی سالمیت کے دشمن ہیں ان پر قدغن لگنا ضروری ہے۔'
