'مرکزی حکومت راجستھان کو مناسب مقدار میں کورونا ویکیسن فراہم کرے'

ملک کی متعدد ریاستوں میں کورونا ویکسین کی کمی کی اطلاعات کے درمیان راجستھان کے وزیر صحت رگھو شرما نے دعویٰ کیا ہے کہ اگر مرکزی حکومت نے اس ویکسین کی مناسب مقدار میں خوراک فراہم کی تو اگلے دو ماہ کے دوران ریاست کی پوری آبادی کو ویکسین دی جائے گی۔

ای ٹی وی بھارت سے گفتگو کرتے ہوئے رگھو شرما نے کہا کہ راہول گاندھی نے ویکسینیشن کی شرحوں کے بارے میں سچائی پیش کی ہے لیکن بدقسمتی سے مرکزی حکومت اسے غلط نظریہ سے دیکھ رہی ہے۔ حقیقت یہ ہے کہ ریاستوں کو مناسب مقدار میں ویکسین نہیں مل رہی ہے۔

کانگریس رہنما رگھو شرما نے کہا کہ ریاست میں روزانہ 15 لاکھ افراد کو ویکسین کی ضرورت ہے۔ اگر ہمیں مناسب مقدار میں ویکسین نہیں ملتی ہے تو ہم ریاست کے لوگوں کو مقررہ وقت پر کیسے ویکسین دے پائیں گے؟

انہوں نے مزید کہا کہ مرکزی حکومت نے راجستھان کو جولائی میں ویکسین کی 65 لاکھ خوراکیں دینے کا اعلان کیا تھا جب کہ ابھی بھی 75 لاکھ افراد کو دوسری خوراک دینی ہے۔ اگر ہم لوگوں کو ویکسین کی دوسری خوراک نہیں دے سکتے ہیں تو لوگوں کو پہلی خوراک دینے کا کیا فائدہ؟