وسیم رضوی سمیت شیعہ وقف بورڈ کے 21 اراکین کا بائیکاٹ کرنے کی اپیل

راجستھان کی شیعہ سماجی کارکن میمونہ نرگس نے کہا کہ شیعہ اور سنی مسلمانوں میں نفرت پیدا کرنے کی نیت سے اترپردیش حکومت نے ایک سازش کے تحت متنازع بیان دینے والے وسیم رضوی کو دوبارہ شیعہ وقف بورڈ کا ممبر منتخب کیا ہے۔ یہی وجہ ہے کہ ملک کے عوام میں غلط میسج جا رہا ہے۔

راجستھان کے دارالحکومت جے پور سے تعلق رکھنے والی میمونہ نرگس نے شیعہ سماج کے تمام افراد سے اپیل کی ہے کہ وہ وسیم رضوی اور اس کے ساتھ 21 ممبران کا بائیکاٹ کریں۔

انہوں نے کہا کہ وسیم رضوی اور ان کے ساتھیوں کو شیعہ جماعت سے باہر بھی کیا جانا چاہیے، کیونکہ اتر پردیش حکومت اور وسیم رضوی جیسے لوگ شیعہ اور سنی میں نفرت پیدا کر رہے ہیں۔

واضح رہے کہ وسیم رضوی نے قرآن پاک کی 26 آیتوں کو ہٹانے کے لیے سپریم کورٹ میں عرضی داخل کی تھی۔

اس معاملے پر سپریم کورٹ نے وسیم رضوی کو درخواست مسترد کردی اور 50 ہزار کا جرمانہ بھی عائد کیا۔

ایسے میں اتر پردیش حکومت کی جانب سے شیعہ وقف بورڈ میں وسیم رضوی کو رکن بنایا جانا لوگوں کی دل آزاری کا سبب بنا ہے۔ یہی وجہ ہے کہ وسیم رضوی کے خلاف اب آوازیں دوبارہ بلند ہو رہی ہیں۔