ہنومان گڑھ: راجستھان کے ہنومان گڑھ ضلع کے نورنگڈیسر میں ہفتہ کی دیر شام ایک دلخراش سڑک حادثہ پیش آیا۔ اس خوفناک حادثے میں ایک ہی خاندان کے کم از کم سات افراد ہلاکت کا شکار ہو گئے۔ اس واقعہ میں دو بچے بھی شدید زخمی ہو گئے۔ اس دردناک حادثے کے بعد ہائی وے پر زبردست ٹریفک جام ہوگیا۔
یہ حادثہ اتنا خوفناک تھا کہ کار میں سوار ساتوں افراد موقع پر ہی ہلاک ہوگئے تھے۔ یہ اس وقت پیش آیا جب کار ایک ٹرک سے ٹکرا گئی۔ حادثے کے بعد ٹرک ڈرائیور اپنی گاڑی موقع پر ہی چھوڑ کر فرار ہوگیا۔
ہنومان گڑھ ٹاؤن پولیس اسٹیشن کے افسر ویدپال شیوران نے بتایا کہ گاؤں نورنگڈیسر کے قریب اوور ٹیک کرنے کے دوران ایک ٹرک اور کار کے درمیان زبردست تصادم ہوگیا۔ اس تصادم میں کار کے پرخچے اڑ گئے اور سات افراد موقع پر ہی ہلاک ہوگئے۔ انہوں نے بتایا کہ اس حادثے میں دو بچے بھی شدید زخمی ہوئے ہیں، جنہیں علاج کے لیے بیکانیر میں ہاسپٹل منتقل کردیا گیا ہے۔ حادثے کے بعد ٹرک ڈرائیور فرار ہو گیا۔ انتظامیہ نے موقع پر پہنچ کر صورتحال کا جائزہ لیا اور ٹرک ڈرائیور کی گرفتاری کے لیے کوششیں شروع کر دیں۔