راجستھان کے ضلع دھول پور کے کوتوالی تھانہ علاقے میں مدھیہ پردیش بارڈر پر چمبل پل سے دو پولیس اہلکاروں کو اغوا کرنے کا معاملہ سامنے آیا ہے۔ ایک درجن سے زائد ملزمان نے دونوں پولیس اہلکاروں کو اغوا کرلیا اور ان کو شدید مارا پیٹا۔ حملے کے بعد ملزمان موقع پر ہی پولیس اہلکاروں کو مردہ سمجھ کر چھوڑ گئے اور ان کی موٹر سائیکل بھی ساتھ لے گئے۔
ضلع ہسپتال کے ایمرجنسی وارڈ میں داخل کانسٹبل وجے پال سنگھ اور ہری اوم یادو سے ملنے پہنچے ایس پی مردل کچھاوا نے بتایا کہ کوتوالی پولیس اسٹیشن میں تعینات دونوں کانسٹبل معمول کے مطابق چمبل پل کی طرف گشت پر گئے تھے۔ اسی دوران کار اور موٹر سائیکل پر سوار ایک درجن افراد مدھیہ پردیش بارڈر کی طرف سے آئے اور راجستھان کی سرحد پر کانسٹیبل کی موٹر سائیکل کو روک لیا اور ان کے ساتھ جھگڑا شروع کر دیا۔ جس کے بعد ملزمان نے دونوں پولیس اہلکاروں کو مدھیہ پردیش بارڈر کی طرف لے گئے۔ جہاں ملزمان نے دونوں پولیس اہلکاروں کو بیلٹ اور لاٹھیوں سے مارا پیٹا۔ یہ سمجھتے ہوئے کہ دونوں پولیس اہلکار ہلاک ہو گئے ہیں موقع واردات سے ملزمان اپنی بائیک لے کر فرار ہوگئے۔ زخمیوں کی اطلاع پر موقع پر پہنچی کوتوالی پولیس رات گئے ضلع ہسپتال کے ایمرجنسی وارڈ میں دونوں کو داخل کرایا۔
اس کیس کے بارے میں ایس پی مردل کچھاوا نے کہا کہ ملزموں کی شناخت کی جارہی ہے۔ کیس کی نشاندہی ہوتے ہی ملزمان کے خلاف کاروائی کی جائے گی۔ ان کا کہنا ہے کہ یہ ریت مافیا والے لوگ ہیں جنہوں نے اس واقعے کو انجام دیا ہے۔
