مرکزی حکومت کے ذریعہ تشکیل شدہ کمیٹی کے ماتحت اجمیر درگاہ کمیٹی میں اشفاق حسین دو بار ناظم رہے ہیں۔ جمعرات کے روز انہوں نے ناظم کی ذمہ داری سنبھالنے سے قبل اپنے پورے خاندان کے ہمراہ درگاہ شریف کی زیارت کا شرف حاصل کیا۔
سلطان الہند حضرت خواجہ غریب نوازؒ درگاہ کی انتظامیہ کمیٹی کے دفتر میں نئے ناظم کا استقبال کیا اور گلپوشی کر عزت و احترام سے انھیں نوازا گیا۔
اس موقع پر اشفاق حسین نے میڈیا سے گفتگو کرتے ہوئے کہا کہ کورونا وائرس وبأ کے پیش نظر زائرین پر خصوصی توجہ دی جائے گی اور ساتھ ہی خواجہ صاحب کی تعلیمات کی تبلیغ کرکے تصوف کو فروغ دیا جائے گا۔
اشفاق حسین نے مزید کہا کہ اجمیر درگاہ میں جاری ترقیاتی کاموں کا بھی جائزہ لیں گے اور کمیٹی کے ذریعہ قائم کردہ درگاہ کے ترقیاتی ایجنڈے کو عملی جامہ پہنانے کے لیے ہر ممکن کوشش کریں گے
درگاہ کے نومنتخت ناظم سے توقع کی جارہی ہے کہ زائرین اور درگاہ کے ترقیاتی کاموں میں تیزی آئے گی اور خواجہ صاحب کے آنے والے عرس سے قبل ہی تمام ترقیاتی کام مکمل ہوجائیں گے۔