'ناگور کے واقعہ پر راجستھان حکومت فوری طور پر کارروائی کرے'

کانگریس کے سابق صدر راہل گاندھی نے راجستھان کے ناگور میں دو دلت نوجوانوں کے ساتھ غیرانسانی سلوک کیے جانے کے واقعہ کی سخت مذمت کرتے ہوئے ریاستی حکومت سے ملزمین کے خلاف فوری طور پر کارروائی کرنے کی درخواست کی ہے۔

راہل گاندھی نے ٹویٹ کرکے کہا کہ 'راجستھان کے ناگور میں دو دلت نوجوانوں پر ظلم کے تعلق سے حال ہی میں ایک خوفناک اور دردناک ویڈیو سامنے آیا ہے۔ میں ریاستی حکومت سے اس سفاکانہ جرم کرنے والوں کے خلاف فوری طورپر کارروائی کرنے کی درخواست کرتا ہوں۔'

راہل گاندھی ٹوئٹ

خیال رہے کہ ضلع ناگور کے پانچوڑی علاقہ کے کرنو گاؤں میں بدمعاشوں نے ایک دلت نوجوان کے ساتھ گزشتہ اتوار کو ظالمانہ سلوک کیا تھا جس کا ویڈیو وائرل ہوا ہے۔ اس میں بتایا گیا کہ نوجوان کے ساتھ پہلے بے رحمی سے مارپیٹ کی گئی اور پھر اس کے پرائیوٹ پارٹ میں پیٹرول ڈالا گیا۔ اسے پانی پلا پلا کر مارا گیا۔ اس دوران وہاں موجودہ نوجوان کے چاچا زاد بھائی کی بھی جم کر پٹائی کی گئی۔