اجمیر: ہسپتال میں سہولیات نہ ملنے کے سبب احتجاج

اجمیر کے جواہر لعل نہرو ہسپتال کے محکمہ یورولوجی میں کام کرنے والے افراد نے ہسپتال میں سہولیات نہ ملنے کے خلاف احتجاج کیا۔

ریاست راجستھان کے شہر اجمیر میں واقع جواہر لعل نہرو ہسپتال کے محکمہ یورولوجی میں کووڈ 19 لیب میں کام کرنے والے 11 نرسنگ اہلکاروں کے ذریعہ لیب کے باہر مظاہرہ کیا گیا اور بتایا کہ ہماری ذمہ داری لیب میں کووڈ 19 کی تحقیقات پر ہے اور ہم سب ضلع اجمیر کے باہر سے آتے ہیں۔ لیکن ہسپتال ہمیں کوئی سہولیات نہیں دے رہا ہے جس سے ہم سب کو بہت زیادہ پریشانی ہوتی ہے۔

ایک اہلکار نے ای ٹی وی بھارت سے بات کرتے ہوئے بتایا کہ ہسپتال ہمیں کسی بھی قسم کی سہولیات مہیا نہیں کرا رہا ہے اور نہ ہی ہمیں کھانا ہسپتال انتظامیہ فراہم کرا رہا ہے اور نہ ہی ہمارے آنے جانے کا کرایہ دیا جاتا ہے۔ یہی وجہ ہے کہ ہم مالی اور دماغی طور پر دشواری کا سامنا کر رہے ہیں۔

یہ سب لوگ ہسپتال میں ذہنی اذیت کے باوجود بھی ایمانداری سے اپنی ڈیوٹی کر رہے ہیں۔ ایسے میں یہ سب چاہتے ہیں کہ انتظامیہ ان کے مطالبات سنے اور حل کرے۔