جے پور: ہاتھرس ڈی ایم کی رہائش گاہ پر بھیم آرمی کا مظاہرہ

ریاست اترپردیش میں ہاتھرس کے ڈی ایم پروین کمار لشکر کے خلاف جے پور میں واقع ان کی رہائش گاہ کے باہر احتجاجی مظاہرہ کیا گیا۔ جے پور کے ویشالی نگر علاقہ میں واقع پروین کمار کی رہائش گاہ کے باہر بھیم آرمی کے کارکنان نے کچرا پھینکا اور ان کے خلاف جم کر نعرے بازی بھی کی۔

ریاست راجستھان کے دارالحکومت جے پور میں آج شام بھیم آرمی کے ضلعی صدر اور ریاستی نائب صدر جتیندر والمیکی کی قیادت میں بھیم آرمی کے کارکنان اپنے ساتھ کچرے کی بوری لے کر ڈی ایم کی رہائش گاہ کے باہر پہنچے اور وہاں پر جم کر نعرے بازی کرتے ہوئے لایا گیا کچرا ڈی ایم کے گھر کے باہر پھینک دیا۔

انہوں نے مختلف طرح کے پوسٹر بھی ڈی ایم کے گھر کے باہر چسپاں کیے۔ علاقے کے لوگوں نے راجستھان پولیس کو پورے معاملے کی اطلاع دی، جس کے بعد میں پولیس موقع پر پہنچی۔ واقعہ کے بعد ہاتھرس ڈی ایم کے گھر کے باہر میں سیکیورٹی بھی تعینات کر دی گئی ہے۔

بھیم آرمی کے کارکنان ڈی ایم کی رہائش گاہ کے سامنے کھڑے ہوکر 'بہن کے سمان میں، بھیم آرمی میدان میں'، 'یہ ڈی ایم نہیں قاتل ہے، کرسی کا دور بند کرو' جیسے نعرے لگائے۔

اس موقع پر بھیم آرمی کے متعدد کارکنان موجود تھے۔