جے پور: راجستھان میں سی آئی ڈی کرائم برانچ جے پور کی ٹیم نے سائبر فراڈ کے مزید دو ملزمین کو گرفتار کیا ہے۔ ایڈیشنل ڈائریکٹر جنرل آف پولیس (کرائم) دنیش ایم این نے کہا کہ دونوں ملزمان حقیقی بھائی ہیں۔ جے پور میں رہتے ہوئے چائے کی دوکان پر بیٹھ کر وہ بے روزگار طلبہ کو اعتماد میں لے کر تین ہزار روپے دے کر پہلے ان کا مختلف بینک میں کھاتا کھلواتے بعد میں ان کھاتوں کو سائبر ٹھگوں کے ہاتھوں 13000 روپے میں فروخت کردیتے۔ ایم این نے بتایا کہ سی آئی ڈی کرائم برانچ کی ٹیم نے 5 اپریل کو جواہر نگر تھانہ علاقہ میں فرضی طریقے سے اے ٹی ایم بناکر دن میں 10-12 لاکھ روپے اے ٹی ایم سے نکالنے والے تین ملزمان کو گرفتار کرکے 11.73 لاکھ روپے ضبط کیے تھے۔
اس معاملے میں سی آئی ڈی جے پور، بھرت پور اور کوٹا پولیس نے اب تک کل 15 ملزمان کو گرفتار کیا ہے۔ انہوں نے بتایا کہ سی آئی ڈی کرائم برانچ کی ٹیم ان ملزمان کے گینگ پر مسلسل نظر رکھے ہوئے تھی۔ ڈی آئی جی کرائم راہل پرکاش کی نگرانی اور اے ایس پی ہری رام کماوت کے سپر وزن میں انٹیلی جنس اکٹھا کرنے کے دوران، ٹیم کو آدتیہ جانگڑ (24) اور اس کے بھائی روی جانگڑ (21) ساکن پولیس اسٹیشن کھیڑلی، ڈسٹرکٹ الور ہال، جے پور کے بارے میں اطلاع ملی۔ اطلاع پر ان کے بارے میں معلومات حاصل کی گئیں اور ان پر مسلسل نظر رکھی گئی۔