جے پور: این ایس یو آئی کا مرکزی حکومت کے خلاف احتجاج

راجستھان کے جے پور میں واقع اسٹیچو سرکل پر طلبا یونین این ایس یو آئی کے ریاستی صدر ابھیشیک چودھری کی قیادت میں مرکزی حکومت کے خلاف احتجاج کیا گیا۔

ریاست راجستھان کے دارالحکومت جے پور میں اسٹیچو سرکل پر این ایس یو آئی کے کارکنان نے وزیر اعظم نریندر مودی اور وزیر داخلہ امت شاہ کا مکھوٹا پہن کر احتجاج کیا اور مرکزی حکومت سے اپیل کی کہ موجودہ وقت میں راجستھان میں ای ڈی اور سی بی آئی کے ذریعے جو کاررواہی کی جا رہی ہے اس کو روکا جائے۔ یہ احتجاج این ایس یو آئی کے ریاستی صدر ابھیشیک چودھری کی قیادت میں کیا گیا۔

اس موقع پر ابھیشیک چودھری نے بتایا کہ آج ای ڈی اور سی بی آئی کے ذریعے جس طرح سے مرکزی حکومت جو راجستھان کی عوام کی منتخب کی ہوئی حکومت ہے اس کو گرانے کا کام کر رہی ہے۔ اس لیے ہم یہاں سے آج یہ مطالبہ کرتے ہیں کہ اس کو فورا روکا جائے۔

انہوں نے بتایا کہ ریاست کے وزیر اعلی اشوک گہلوت اور ریاستی کانگریس کے جو ذمہ داران ہیں ان کے رشتہ داروں پر جس طرح سے دباؤ بنانے کے لیے سی بی آئی اور ای ڈی کے ذریعے کاررواہی کی جارہی ہے وہ کسی بھی صورت میں صحیح نہیں ہے۔

اس احتجاج میں این ایس یو آئی کے کارکنان، ذمہ داران اور دیگر افراد بھی موجود تھے اور یہاں پر ان تمام لوگوں نے جم کر نعرے بازی کی۔ وہیں، کسی طرح کا ماحول خراب نہ ہو اس کے لیے پولیس بھی کافی مستعد نظر آئی۔