پہلو خان ماب لنچنگ کیس: فیصلہ آج متوقع

راجستھان کے ضلع الور میں پہلو خان کی بھیڑ کے ذریعہ پٹائی کے بعد موت کے معاملے میں آج عدالت فیصلہ سنا سکتی ہے۔

سپریم کورٹ کے حکم پر پہلو خان ماب لنچنگ کیس بهروڑ ایڈیشنل کورٹ سے الور کے ایڈیشنل سیشن کورٹ نمبر ایک میں منتقل کر دیا گیا تھا۔ تبھی سے اس معاملے کی سماعت مسلسل اسی عدالت میں جاری ہے۔
جسٹس ڈاکٹر سریتا سوامی نے دونوں فریقوں کی دلیل سننے کے بعد بدھ تک کے لیے فیصلہ محفوظ کرلیا ہے۔
ایڈیشنل پبلک پراسیکیوٹر یوگیندر كھٹانا نے بتایا کہ یکم اپریل 2017 کو بهروڈ تھانہ علاقے میں پہلو خان اور اس کے بیٹے، گایوں کو لے کر جا رہے تھے تبھی بھیڑ نے مبینہ طور پر ان کے ساتھ مارپیٹ کی۔ علاج کے دوران چار اپریل کو پہلو خان کی موت ہوگئی تھی۔

اس معاملے کی پولیس کی طرف سے چارج شیٹ پیش ہونے کے بعد مسلسل سماعت ہوئی۔ پہلو خان کے بیٹوں سمیت 47 گواہوں کے بیان کورٹ میں درج کرائے گئے ہیں۔