سوشل میڈیا پر وائرل ایک ویڈیو اور چند پیغامات کےسلسلے میں جب ای ٹی بھارت کے نمائندے نے راجستھان مسلم وقف بورڈ کے چیئرمین ڈاکٹر خانو خان بودھوالی سے بات کی تو انہوں نے کہا کہ قبرستان کی زمین پر کوئی بھی دکان کی تعمیر نہیں کروائی جا رہی ہے بلکہ وہاں پر وضو خانہ بنوایا جارہا ہے۔
انہوں نے کہا کہ لوگوں کی پریشانی کے پیش نظر ایک غسل خانہ اور ایک حوض تعمیر کروایا جا رہا ہے۔
خانو خان بودھوالی نے مزید کہا کہ چند افراد سوشل میڈیا پر یوں ہی افواہ پھیلا رہے ہیں۔ انہوں نے دعوی کیا کہ افواہ پھیلانے والے خود قبرستان کی زمین پر ناجائز قبضہ کرنا چاہتے ہیں۔ مگر بحیثیت چیئرمین وہ ایسا نہیں ہونے دیں گے ۔
انہوں نے مزید کہا کہ جو لوگ یہ کہہ رہے ہیں کہ قبرستان کی زمین پر مکان تعمیر کروایا جا رہا ہے، ایسے لوگوں سے یہی کہنا ہے کہ ایک بار خدا کے واسطے اپنے اپنے دلوں پر ہاتھ رکھ کے بتا ئیں کہ کیا واقعی وہاں پر دوکانیں تعمیر کرائی جارہی ہیں ؟
انہوں نے کہا کہ ایسے لوگوں کو چاہئے کہ اللہ سے خوف کھائیں اور افواہ پھیلانے سے بچیں۔