بھارتی ریاست راجستھان کے دارالحکومت جے پور کے رام گنج علاقے میں گزشتہ روز ایک شخص میں کورونا وائرس کی رپورٹ پوزیٹیو پائی گئی تھی، اس کے بعد رام گنج علاقے میں ایک کلومیٹر تک گزشتہ شب کرفیو لگا دیا گیا تھا۔
اس کے بعد مریض جن لوگوں سے ملا تھا۔ ان تمام لوگوں کی ایک فہرست بنائی گئی تو یہ سامنے آیا کہ وہ شخص سیکڑوں لوگوں سے ملا تھا۔
اس کے بعد آج ریاست کے وزیر اعلی اشوک گہلوت نے پولیس محکمے اور دیگر محکمے کے افسران کے ساتھ ایک اہم میٹنگ کی اور اس میٹنگ میں یہ فیصلہ کیا کہ جے پور کے سات تھانہ علاقوں میں کرفیو نافذ کر دیا جائے۔
اس کے بعد اس فیصلے پر عمل درآمد کرتے ہوئے جے پور کے سات تھانوں میں کرفیو لگانے کا اعلان کیا گیا۔
ان سات تھانوں میں رام گنج پولیس تھانہ، سبھاش چوک، مانک چوک، کوتوالی پولیس کے تمام علاقے، غلطا گیٹ پولیس تھانہ، برہم پوری اور ناہر گڑھ کے چار دیواری شامل ہے۔
شام کو سات بجے سے ہی یہاں پر کرفیو نافذ ہو چکا ہے، واضح رہے کہ ریاست راجستھان میں کورونا وائرس کا قہر مسلسل طور پر جاری ہے۔ اب تک راجستھان میں 45 کے قریب معاملے کورونا وائرس کے سامنے آچکے ہیں اور دو لوگ ہلاک بھی ہو چکے ہیں۔
