سلمان خان کی ٹرانسفر پٹیشن پر سماعت ملتوی

سلمان خان کی جانب سے راجستھان ہائی کورٹ میں پیش کی گئی ٹرانسفر پٹیشن پر بدھ کے روز سماعت نہیں ہوسکی جس کی وجہ سے عبوری حکم کو آگے بڑھایا گیا۔

سلمان خان کی جانب سے راجستھان ہائی کورٹ میں پیش کی گئی ٹرانسفر پٹیشن کی سماعت بدھ کے روز جسٹس ڈاکٹر پشپندر سنگھ بھاٹی کی بنچ میں ہونے والی تھی تاہم وقت کی قلت کی وجہ سے ایسا نہیں ہوسکا۔ٹرائل کورٹ میں داخل کی گئی تینوں اپیلوں پر سماعت فی الحال ہائی کورٹ کے عبوری روک کی وجہ سے تعطل کا شکار ہے۔

سلمان خان کی جانب سے ٹرانسفر پٹیشن کے لیے پیش ہوئے ایڈوکیٹ ہستیمل سارسوت نے بتایا کہ سلمان خان کے کالے ہرن شکار معاملے میں تین اپیل ڈسٹرکٹ اینڈ سیشن کورٹ، جودھپور میں زیر التوا ہیں، جو ایک ہی کیس سے متعلق ہیں۔ ایک اپیل شکایت کنندہ پونم چند نے بری کیے گئے سیف علی خان اور دیگر کے خلاف پیش کی ہے۔

وہیں دوسری اپیل ریاستی حکومت کی جانب سے سلمان خان کو غیر قانونی اسلحہ کے معاملے میں بری کیے جانے کے خلاف پیش کی گئی ہے، جبکہ تیسری اپیل کالے ہرن شکار کیس میں پانچ سال کی سزا کے خلاف سلمان خان کی جانب سے پیش کی گئی ہے۔ راجستھان ہائی کورٹ میں اداکار سیف علی خان ، نیلم ، تبو ، سونالی بیندرے اور دشینت سنگھ کے خلاف پہلے سے ہی ریاستی حکومت کی جانب ایک اپیل پیش کی گئی تھی۔

سلمان کو ہرن شکار کیس میں پانچ سال کی سزا سنائی گئی تھی اور باقی کو بری کر دیا گیا تھا۔ ایسی صورت حال میں جب حکومت کی طرف سے ہائی کورٹ میں اپیل پہلے ہی پیش کی جا چکی ہے تو پھر سلمان سے متعلق تمام اپیلوں کو راجستھان ہائی کورٹ میں ہی سنا جانا چاہیے۔

سلمان خان کے وکیل سارسوت نے ہائی کورٹ کو بتایا کہ ماضی میں بھی سلمان خان سے متعلق دو اپیلوں کو راجستھان ہائی کورٹ میں منتقل کرکے سماعت کی گئی تھی۔ جس کے لیے ہائی کورٹ نے پٹیشن نمبر 23/2011 میں 04.11.2011 کو حکم جاری کیا تھا۔ موجودہ وقت میں تین اپیلیں ڈسٹرکٹ اینڈ سیشن کورٹ جودھپور میں زیر التوا ہیں ، انہیں راجستھان ہائی کورٹ میں منتقل کیا جانا چاہیے۔