'مرکز کے دباؤ میں گورنراسمبلی اجلاس نہیں بلا رہے ہیں'

راجستھان کے وزیراعلیٰ اشوک گہلوت نے الزام عائد کیا کہ گورنر کلراج مشر مرکزی حکومت کے دباؤ میں اسمبلی کا اجلاس نہیں بلا رہے ہیں۔

مسٹر گہلوت نے آج راج بھون کے باہر صحافیوں سے بات چیت کرتے ہوئے کہا کہ گورنر کی طرف سے کابینہ کے فیصلے کو ماننے کی ایک روایت رہی ہے اور ہم نے ان سے اس کے تحت اسمبلی اجلاس بلانے کی مانگ کی ہے۔

انہوں نے کہا کہ کورونا وبا جاری ہے ، اسمبلی اجلاس میں اس پر بحث کریں گے اور اکثریت بھی ثابت کریں گے۔ انہوں نے کہا کہ ہم امید کرتے ہیں کہ گورنر کسی کے دباؤ میں نہیں آئیں گے اور وہ جلد ہی اس پر فیصلہ لیں گے۔ انہوں نے کہا کہ حزب اختلاف ہمیشہ اسمبلی اجلاس بلانے کا مطالبہ کرتی ہے لیکن اس بار حکمران جماعت اسمبلی اجلاس بلانے کی درخواست کر رہی ہے اور اسمبلی میں دودھ کا دودھ اور پانی کا پانی ہو جائے گا ۔ لیکن یہ سمجھ سے بالاتر ہے کہ اسمبلی اجلاس کیوں نہیں بلایا جارہا ہے۔

مسٹر گہلوت نے کہا کہ تمام اراکین اسمبلی راج بھون کے احاطہ میں گاندھیائی طریقے سے بیٹھے ہیں اور گورنر کے فیصلے کے منتظر ہیں۔ ان کا فیصلہ آ جانے کے بعد ہی ہم آگے کی حکمت عملی پر تبادلہ خیال کریں گے اور اس پر عمل کریں گے تب تک ہم یہاں بیٹھیں گے۔